Reseı benzın men dızel eksportyna shekteý qoıdy

Reseı úkimeti benzın men dızel otynyn eksporttaýǵa ýaqytsha shekteý engizdi, dep habarlaıdy QazAqparat tilshisi.

RF úkimetiniń resmı saıtynda jarııalanǵan qaýlyda jazylǵandaı, mundaı sheshim ishki naryqtaǵy jaǵdaıdy turaqtandyrý úshin qabyldanǵan.

«Osy qaýly kúshine engen kúnnen bastap benzın jáne dızel otynyn (onyń ishinde bırja arqyly satyp alynǵan) áketýge ýaqytsha tyıym salynsyn. Qaýlynyń 1-shi tarmaǵynda kórsetilgen, ıaǵnı Eýrazııalyq ekonomıkalyq odaqqa múshe-memleketterdiń úkimetaralyq kelisimine saı, bul qaýlymen tıisti tyıym salynbaıdy», - delingen RF premer-mınıstri Mıhaıl Mıshýstın qol qoıǵan qaýlyda.

Qujatta naqtylanǵandaı, bul shekteýler EAEO-ǵa múshe elderge qatysty qoldanylmaıdy. Atap aıtqanda, odaqqa Qazaqstan, Qyrǵyzstan, Armenııa, Belarýs jáne Reseı memleketteri múshe.

Qaýly qol qoıylǵan kúnnen, ıaǵnı 21 qyrkúıekten bastap kúshine enedi.