«Kanal-Perehvat» operatsııasy: UQShU-ǵa múshe elder aýmaǵynda 2,5 tonna esirtki tárkilendi

Ujymdyq qaýipsizdik týraly shart uıymynyń (UQShU) halyqaralyq esirtkige qarsy «Kanal-Perehvat» operatsııasy aıaqtaldy. Onyń qorytyndysy Almaty qalasynda ótken jıynda shyǵaryldy. Muny Іshki ister mınıstrliginde ótken brıfıngide vedomstvonyń ókili Shuǵyla Turlybek aıtty, dep habarlaıdy QazAqparat tilshisi.

«Arnaıy operatsııa nátıjesinde UQShU-ǵa múshe memleketterdiń aýmaǵynda 900-den astam esirtki qylmysy anyqtaldy. 2,5 tonna esirtki tárkilendi, onyń ishinde 19,5 keli geroın, 856 keli apıyn, 560 keli gashısh, 240 keli marıhýana jáne 248 keli sıntetıka. 2800-ge jýyq oq-dári men 48 qarý tabyldy jáne tárkilendi. 5 esirtki zerthanasy joıyldy. 561 adam jaýapqa tartyldy», - dedi ІІM ókili Shuǵyla Turlybek.

Qazaqstan aýmaǵynda ótken operatsııaǵa Ulttyq Ulannyń tikushaqtary, drondary jáne jol talǵamaıtyn áskerı kólikteri jumyldyryldy. Esirtkini tasymaldaý joldary men arnalaryn joıý úshin birlesken mobıldi toptar quryldy.

«Qazaqstannyń quqyq qorǵaý jáne arnaýly organdarymen 94 qylmystyq is qozǵaldy, onyń ishinde 17 faktisi kontrabanda boıynsha. Zańsyz aınalymnan 455 keli túrli esirtki, onyń ishinde 53 gramm geroın, 173 keli marıhýana, 2,2 keli gashısh, 18 keli sıntetıka tárkilendi. 3 esirtki zerthanasy joıyldy. 147 adam jaýapqa tartyldy», - dep málim etti Shuǵyla Turlybek.