Qazaqstandyqtardyń qansha paıyzy paıdaly azyq-túlik satyp alady
Qazaqstanda halyqtyń 30 paıyzy turaqty medıtsınalyq tekserýden ótpeıdi. Bul týraly Astanada densaýlyq saqtaý salasyndaǵy STADA Healt Report zertteýin tanystyrý barysynda málim boldy, dep habarlaıdy QazAqparat tilshisi.
Bul zertteý Qazaqstanda ekinshi ret uıymdastyrylǵan. Onyń aıasynda 16 memleket qamtylyp, ár elde shamamen 2 myń adam arasynda saýalnama júrgizildi. Jalpy, 16 elde 18-99 jas aralyǵyndaǵy 32 013 adam saýlnamaǵa qatysty.
«Eýrazııa» óńirindegi STADA vıtse-prezıdenti Armınas Matsevıchýstiń aıtýynsha, Qazaqstanda respondentterdiń 38 paıyzy densaýlyq saqtaý júıesiniń deńgeıine qanaǵattanarlyq baǵa bergen. Alaıda qazaqstandyqtardyń 30 paıyzdan astamy turaqty tekserýden ótpeıtini anyqtalǵan. Bul rette turǵyndar qaı medıtsınalyq tekserýden ótý kerek ekenin bilmeıtinin aıtqan.
Bıylǵy zertteý derekterine qaraǵanda, saýalnamaǵa qatysqan qazaqstandyqtardyń 37 paıyzy túrli dárýmenderdi satyp alýǵa erekshe mán berip otyrǵany jarııalandy. Sonymen qatar adamdardyń 26 paıyzy densaýlyqqa paıdaly azyq-túlik ónimderin satyp alatyndaryn atap ótken. Respondentterdiń 19 paıyzy profılaktıkalyq medıtsınalyq tekserýden jıi ótetinin aıtyp otyr.
Skrınıngterdiń arasynda eń tanymal protsedýra gınekologııalyq tekserýge qatysty bolǵan, ıaǵnı Qazaqstanda áıelderdiń 80 paıyzy men eýropalyqtardyń 70 paıyzy osy dıagnostıkadan turaqty túrde ótedi eken. Munymen qosa, Qazaqstanda medıtsınalyq tekserýler arasynda ekinshi orynda jalpy qan analızi tur, adamdardyń 71% osy saraptamadan ótken. Árbir altynshy qazaqstandyq (64%) turaqty túrde jalpy tekserýden ótetinin jetkizgen.
Al uıqy sapasyn jaqsartý turǵysynda qazaqstandyqtar saýalnamaǵa qatysqan basqa elder arasynda aldyńǵy orynǵa shyqqan. Bul rette saýlnama kezinde adamdardyń 87 paıyzy ózderin uıqysyzdyq mazalamaıtynyn málimdegen.
Qazaqstan medıtsına salasyndaǵy ınnovatsııalardy engizý baǵytynda da jaqsy kórsetkishterdi baıqatty. Máselen, Qazaqstanda dárigerdiń qabyldaýyna onlaın rejımde jazylý kórsetkishteri ortashadan joǵary deńgeıde, ıaǵnı 52 paıyzǵa jetken. Al Eýropada osy kórsetkish 45 paıyz shamasynda boldy, - dedi Armınas Matsevıchýs.
