Norma boıynsha Astanada 1 mıllıonnan sál-aq artyq adam tura alady – depýtat
Májilis depýtaty Naýryz Saılaýbaı Premer-Mınıstrdi atyna respýblıkalyq mańyzdaǵy úsh megapolıste halyq sanynyń shekten tys artyp, aýyldar bos qalyp jatqany týraly saýal joldady, dep habarlaıdy QazAqparat tilshisi.
«Qazir biz ishki kóshi-qonnyń beıbereket úderisin kórip otyrmyz. Saldarynan iri megapolıster men qalalarǵa qaptap kelip jatqan jańa turǵyndary retteı almaı jatyrmyz. Buǵan jaqynda Astana qalasynda bolǵan sý tapshylyǵy dálel. 30 jyldyń ishinde qazaqstandyqtar kóbine elimizdiń soltústik jáne soltústik-shyǵys shekaralas óńirlerinen údere kóshken. Ásirese Aqmola, Shyǵys Qazaqstan, Qaraǵandy, Pavlodar jáne Soltústik Qazaqstan oblystarynan. Atalǵan 6 óńir halyqtyń 40-15%-yn joǵaltyp otyr. Sonymen qatar elimizdiń 8 óńirinde aýyl halqy aıtarlyqtaı azaıyp bara jatqany baıqalyp otyr», - dedi ol
Depýtat ótken ǵasyrdyń 60-jyldarynda eldegi ýrbanızatsııa ındýstrııalandyrýmen baılanysty bolsa, qazir eshqandaı ekonomıkalyq negizsiz júrip jatyr degen oı aıtty.
«Almaty qalasy turǵyn úı qurylysy qarqyndy júrip jatqan iri «ınvestıtsııalyq jobaǵa» aınaldy. Ondaǵy kóterme saýda bazarlarynyń aınalasynda margınaldy toptardyń qatary kóbeıip jatyr. Almaty halqynyń tabysy 2015 jyldan bastap nebári 2% paıyzǵa ǵana ósken. Almatylyq eresekterdiń tórtten bir bóliginde áleýmettik medıtsınalyq saqtandyrý joq. Ár 10 qylmystyń 9-yn jumyssyzdar jasaıdy. Elimizdegi árbir besinshi jumyssyz jas azamat Almatyda turady. Sol sııaqty Astanaǵa da kóship kelgen, kóptegen azamat ómir súrýge laıyqtalmaǵan saıajaı alqaptarynda turýǵa májbúr. Al bul keıde áleýmettik qaıǵyly jaǵdaılarǵa ákep soǵyp jatady», - dep toqtady Májilis depýtaty.
Onyń aıtýynsha, Almaty qalasyndaǵy Ekonomıka ınstıtýtynyń ǵalymdary qurylys normalary men erejelerinde jazylǵan normatıvterdi eskere otyryp, megapolısterdiń demografııalyq syıymdylyǵyna taldaý jasaǵan.
«Sol taldaýdyń qorytyndysy boıynsha, Shymkent qalasynyń demografııalyq syıymdylyǵy, tabıǵı resýrstardy eskersek, 600 myń adamnan aspaýy tıis. Al Almatyda syıymdylyq shegi – 1,2 mln adam. Astanada norma boıynsha 1 mıllıonnan sál-aq artyq adam tura alady degen qorytyndyǵa keldi», - dedi Naýryz Saılaýbaı.
Depýtat aýyl halqy azaıa berse, aýyl sharýashylyǵymen aınalysatyn adam qalmaıdy degen pikirin jetkizdi.
«Astananyń Bas josparynda qalanyń halqy kóshi-qonnan soń jyl saıyn 100 myń jańa turǵynǵa kóbeıetini eskerile me? Aldaǵy 10 jylda qalada qansha mektep, aýrýhana salynady jáne qansha orynǵa esepteledi? Almatyǵa qonys aýdaryp jatqan azamattardyń jyl saıynǵy sany qandaı jáne bul jaǵdaı áleýmettik jáne ınjenerlik ınfraqurylym nysandaryn salýǵa qatysty qalanyń bas josparynda qalaı eskeriledi? Aldaǵy bes jylda Astana men Almaty qalalarynda qansha jumys ornyn qurý josparlanyp jatyr?» - dep saýal joldady Májilis ókili.
