Batys Qazaqstanda 175 tonna pishen janyp ketti

Batys Qazaqstan oblysynda 175 tonna pishen janyp ketti, dep habarlaıdy QazAqparat tilshisi.

BQO TJ departamentiniń baspasóz qyzmetinen málim etkendeı, oqıǵa 19 qyrkúıek kúni Terekti aýdanynda bolǵan.

«Saǵat 16.37-de Dolınnyı kentinen 7 shaqyrym jerde «Álıjan» sharýa qojalyǵynyń qorasy órtenip jatqany jóninde habar tústi. Oqıǵa ornyna jetken órt sóndirýshiler shamamen 300 sharshy metr aýmaqta 175 tonna pishenniń (700 oram) janyp jatqanyn anyqtady. Zardap shekkender joq. Tilsiz jaý saǵat 20.32-de oqshaýlanyp, 20 qyrkúıek kúni saǵat 00.20-da aýyzdyqtaldy. Qazir órttiń shyǵý sebebi, keltirilgen shyǵyn anyqtalý ústinde», – dep habarlady vedomstvodan.

Departament málimeti boıynsha jyl basynan beri oblysta barlyǵy 413 órt tirkelse, sonyń 38-i shóp qorasynda bolǵan.