Tyǵyz qurylysqa jol joq: 1 qańtardan jańa talaptar engiziledi
2024 jyly 1 qańtarda zańsyz qurylysty boldyrmaýǵa baǵyttalǵan biryńǵaı qala qurylysy saraptamasy qoldanysqa enedi. Bul týraly QR Ónerkásip jáne qurylys mınıstrligi Qurylys jáne turǵyn úı-kommýnaldyq sharýashylyq komıteti tóraǵasynyń orynbasary Baqytjan Júnisbekov Ortalyq kommýnıkatsııalar qyzmetinde ótken baspasóz máslıhatynda aıtty, dep habarlaıdy QazAqparat tilshisi.
Onyń aıtýynsha, barlyq qurylys jobalary keshendi qala qurylysynyń memlekettik saraptamasynan ótedi. Memlekettik baqylaýdy kúsheıtý boıynsha jańa quraldar ázirlenip, ishinara engizildi jáne salany avtomattandyrý, tsıfrlandyrý jumystary júrgizilip jatyr.
«Atap aıtqanda, óńirlerde qala qurylysyn damytýdyń júıeli josparynyń bolmaýynan jáne arhıtektorlardyń salynyp bitken terrıtorııany odan saıyn tyǵyzdaýynan jumys istep turǵan ınjenerlik jelilerdiń qýaty jetpeı, shamadan tys júkteme túskenin, áleýmettik nysandardyń, rekreatsııalyq aımaqtardyń jaqyn qoljetimdi bolmaýyn, jol ınfraqurylymyndaǵy keptelisterdi kórip otyrmyz. Atap aıtqanda, ákimdikter egjeı-tegjeıli jospar ázirleý kezinde bas jospardyń jobalyq sheshimderinen negizsiz aýytqyp ketedi, negizgi josparda jalǵan derekterdi jazady, ınfraqurylymsyz beıbereket qurylysqa, egjeı-tegjeıli jospardy zańsyz túzetýge jol beredi», –dep synǵa aldy B. Júnisbekov.
Osyǵan baılanysty 2020 jyldan beri komıtet arhıtektorlarǵa túrli buzýshylyqtar úshin 218 ákimshilik hattama shyǵarǵan.
«Sapaly Qala josparlaýdy qamtamasyz etý jáne zańsyz beıbereket, tyǵyz qurylysqa jol bermeý úshin bıyl 5 sáýirde qol qoıylǵan Jyljymaıtyn múliktiń biryńǵaı memlekettik kadastryn engizý jónindegi zań sheńberinde Biryńǵaı qala qurylysy saraptamasy engiziledi. Tıisti ózgerister 2024 jylǵy qańtardan bastap kúshine enedi, onda jańadan ázirlengen jáne túzetilgen qala qurylysy jobalary memlekettik qala qurylysy kadastrynyń aqparattyq júıesine mindetti túrde tirkelip, «Memsaraptama» RMK-da keshendi qala qurylysy saraptamasynan ótetin bolady», – dep túsindirdi komıtet ókili.
Qala qurylysy saraptamasynan ótpegen jáne oń qorytyndysyn almaǵan barlyq deńgeıdegi qala qurylysy jobalary bekitilmeıdi jáne odan ári iske asyrylmaıdy. Osylaısha, qabyldanǵan zań azamattardyń ózekti jáne qyzyqtyratyn problemalaryn, onyń ishinde jer ýchaskelerin berý jáne qala qurylysy qujattamasy bolmasa da qurylysqa ruqsat berý sekildi problemalaryn sheshýge múmkindik bermek.
