Memorgandar BAQ-qa qarsy talap merzimin qysqartýdy qoldady – Qanat Ysqaqov

Memlekettik organdar tulǵanyń BAQ-qa qarsy talap merzimin 1 jylǵa deıin qysqartýdy qoldady. Bul týraly Mádenıet jáne aqparat vıtse-mınıstri Qanat Ysqaqov aıtty, dep habarlaıdy QazAqparat tilshisi.

«Mass-medıa týraly qazirgi zań jobasyna talap merziminiń ótýi syndy túsinik qosamyz. Bul jýrnalısterdiń mártebesin arttyratyn tujyrymdamalyq norma. Talap merziminiń ótýi mass-medıa týraly salalyq zańda bolady. Talap merziminiń ótýi degenimiz ne? Qazirgi ýaqytta tulǵanyń ar-namysyna nuqsan keltiretin qandaı da bir aqparat anyqtalǵan jaǵdaıda ol kez kelgen ýaqytqa sotqa bere alady. Qazirgi ýaqytta biz bul merzimdi 3 jylǵa deıin qysqartamyz. Úsh jylǵa deıin usynamyz. Muny Parlament qabyrǵasynda da talqylaımyz. Ókiletti organdarmen de jumys isteımiz. Mınıstrlik ustanymy – taǵy da shaǵyn merzimge qysqartýǵa bolady. Bir jyldy qarastyryp otyrmyz, oǵan qarsy emespiz. Eger tulǵa atalǵan merziminiń ishinde, al qazirgi jaǵdaıda 3 jylda ar-namysyn qorlaý boıynsha buqaralyq aqparat quralyna talap bermese, onda ol bul quqyǵynan aıyrylady. Eger úsh jyl ótip ketse, onda ýaqyt ótti dep eseptelinip, onyń narazylyǵy negizsiz sanalady ári qabyldanbaıdy», - dedi vıtse-mınıstr.

Onyń atap ótýinshe, eń aldymen bul – halyqaralyq tájirıbe. Ekinshiden, bul – halyqaralyq quqyq qorǵaý uıymdarynyń talaby jáne mınıstrliktiń ustanymy.

«Memlekettik organdar qarsy dep aıta almaımyn. Eshkim qarsy shyǵyp otyrǵan joq. Talqylanýy qajetti birqatar norma bar. Sondyqtan da talap merziminiń ótýin shekteý týraly usynysty is júzinde barlyq memlekettik organdardy qoldap otyrǵanyn resmı túrde aıta alamyn», - dedi Qanat Ysqaqov.
Aıta keteıik, búgin Ádilet mınıstri Azamat Esqaraevtyń tóraǵalyǵymen zań jobalaý qyzmeti máseleleri boıynsha keńes ótip, onda «QR Ákimshilik quqyq buzýshylyq týraly kodeksine BAQ máseleleri boıynsha ózgerister engizý týraly» konsýltatıvtik-keńesshi qujat talqylanǵan bolatyn.