Atyraýda óziniń sińlisin jezókshelikke májbúrlegen kúdikti ustaldy
Atyraý oblystyq polıtsııa departamentiniń qyzmetkerleri óziniń 1998 jyly týǵan sińlisin jezókshelikpen aınalysýǵa májbúrlegen Ózbekstan Respýblıkasynyń týmasyn anyqtady. Bul týraly Іshki ister mınıstrliginde ótken brıfıngide vedomstvonyń ókili Shuǵyla Turlybek aıtty, dep habarlaıdy QazAqparat tilshisi.
«Bastapqy tekserý is-sharalary barysynda 2021 jyldyń mamyr aıynda kúdikti jábirlenýshini Tashkent qalasynan Shymkent qalasyna, sodan keıin Atyraý qalasyna alyp kelip, azyq-túlik dúkeninde satýshy bolýdy usynǵany anyqtaldy. Biraq kelgennen keıin qujattaryn alyp, fızıkalyq kúsh kórsetken jáne ony jezókshelikpen aınalysýǵa májbúrlegen Atalǵan fakti boıynsha qylmystyq is qozǵalyp, sotqa deıingi tergeý júrip jatyr», - dedi ІІM ókili Shuǵyla Turlybek.
Osyǵan uqsas fakti Aqtóbe oblysynda da anyqtaldy. Shuǵyla Turlybektiń aıtýynsha, bopsalaý arqyly 17 jastaǵy kolledj stýdentin jarty jyl boıy jezókshelikpen aınalysýǵa tartqan 2004 jylǵy aqtóbelik ustalǵan.
«Atalǵan fakti boıynsha Qylmystyq kodekstiń 134-baby (Kámeletke tolmaǵandy jezókshelikpen aınalysýǵa tartý) boıynsha sotqa deıingi tergeý bastaldy», - dep málim etti vedomstvonyń ókili.
