Arman Dáýletııarov «Shabyt» ortalyǵy týraly: El arasynda heıt bar ekenin bilemin
Belgili shoýmen, telejúrgizýshi Arman Dáýletııarov Astanadaǵy «Shabyt» ulttyq óner ýnıversıtetiniń ǵımaraty men «Táýelsizdik» saraıyndaǵy jóndeý jumystary týraly pikir bildirdi, dep habarlaıdy QazAqparat tilshisi.
Arman Dáýletııarov Astananyń kórki týraly oı qozǵaı kelip, jóndeý júrip jatqan ǵımaratqa toqtaldy.
«Kúrdeli jóndeýden ótip shatqan «Shabyt» ǵımaraty bar. Keremet, tańǵajaıyp nysan. Janynda «Táýelsizdik» saraıy bar. Ol jerde de kúrdeli jóndeý júrip jatyr. Bul máselege baılanysty el arasynda heıt bar ekenin bilemin. Dostar, bul ǵımarattarǵa nazar aýdarylǵanyna qýaný kerek. Keshe osy ındýstrııada jumys isteıtin áriptesterdi kórdim. Olar bul kúnge de jettik dep otyr. Bári ádemi bolý kerek – syrty da, ishi de. Kelisesizder ǵoı. Astana ádemi ǵoı, maqtanam», - deıdi Arman Dáýletııarov.
Buǵan deıin Qazaq ulttyq óner ýnıversıtetiniń basshylyǵy bilim ordasynyń ǵımaraty buzylyp jatqany týraly alypqashpa aqparattardy teriske shyǵarǵan bolatyn.
Sondaı-aq oqý ornynyń resmı saıty ýnıversıtet basqa ǵımaratqa kóshirilip jatqanyn málim etken edi.
Stýdentter «Shabyt» ortalyǵynyń shatyrynan únemi sý aǵatynyn aıtyp, bılik nazaryn osy problemaǵa aýdarý úshin túrli is-sharalar ótkizip kelgenin eske salaıyq. «Jańa adamdar» jastar qozǵalysynyń qatysýymen JOO ǵımaraty aldynda «Shelek shabytty qurtady» atty fleshmob ta ótti.