Atyraý turǵyndary 270 mln teńgeniń salyǵyn áli tólemeı júr

Atyraý qalasynyń turǵyndary 270 mln teńgeniń salyǵyn áli tólemeı júr. Onyń ishinde kólik salyǵyna bereshek kóp, dep habarlaıdy QazAqparat tilshisi. 

Atyraý qalasy boıynsha memlekettik kirister basqarmasy basshysynyń orynbasary Nurbolat Sarmanovtyń deregine qaraǵanda, jyl basynda jergilikti salyq boıynsha bereshek 400 mln teńgege jetken.

«Qazir salyq bereshegi 50%-ǵa azaıyp otyr. Biraq áli salyǵyn tólemeı júrgender bar. Máselen, 4 900 adamnyń kólik salyǵyna 244 mln teńge, 5 300 adamnyń múlik salyǵyna 24 mln bereshegi bar. Al 1 400 adam jer salyǵy úshin 2 mln teńgeni áli tólegen joq», - dep habarlady Nurbolat Sarmanov.

Onyń aıtýynsha, bıyl jergilikti salyq boıynsha 203 mlrd teńge túsim josparlanǵan.

«Jyl basynan beri jergilikti salyqtar boıynsha 248 mlrd teńge túsip, jospar 22%-ǵa artyq oryndaldy. Onyń ishinde múlik salyǵy 36, al kólik salyǵy 17%-ǵa artty. Salyq túsimi aldyńǵy jylmen salystyrǵanda 74 mln teńgege kóbeıdi. Ásirese, kólik salyǵynan 14 mln, jyljymaıtyn múlik salyǵynan 59 mln teńge artyq tústi», - dep habarlady Nurbolat Sarmanov.

Eske sala ketelik, buǵan deıin atyraýlyqtar kólikke 312,8 mln teńge salyq tólemegenin habarlaǵan bolatynbyz.

«Basqa salyq túrlerimen salystyrǵanda, kólik salyǵy edáýir kóbeıip otyr. Ýaqytyly tólenbegen jaǵdaıda kólik salyǵyna sot oryndaýshylary arqyly májbúrlep óndirgeni úshin qosymsha 25% aqy alynady. Kólik salyǵynyń bereshegin tólep úlgerý úshin 1 jyl 3 aı ýaqyt berildi. Aldaǵy ýaqytta osyndaı faktiler taǵy da anyqtalsa, ony turǵyndarǵa ashyq kórsetetin bolamyz», - degen edi Nurbolat Sarmanov.