Úleskerlerden qarjy tartýǵa quqyǵy bar qurylys kompanııalarynyń tizimi shyqty

Elorda prokýratýrasy ýákiletti organdarmen birlesip úlestik qurylys salasynda turaqty negizde jumys júrgizýde, dep habarlaıdy QazAqparat.

"2019 jyldan beri problemaly jyljymaıtyn múlik sany 150-den 32-ge, al aldanǵan úleskerler 16 myńnan 4 myńǵa deıin qysqardy.

Osy kezeńde prokýratýra 4 993 úleskerdiń múddesine 48,5 mlrd teńgege 125 talap-aryz joldady.

Josyqsyz qurylys salýshylarǵa qarsy profılaktıkalyq sharalar qabyldanýda.

Ýákiletti organmen 2019-2023 jyldary úleskerlerden aqsha tartýǵa quqyǵy joq 149 kompanııa ákimshilik jaýapkershilikke tartyldy", - dep jazdy astanalyq prokýratýradan.

Vedomstvo ótken kezeńde 4 qurylysshy sottalǵanyn da málimdedi. Búginde polıtseıler 10 turǵyn úı keshenin salýshy kompanııa basshylaryna qatysty 7 qylmystyq isti tergep jatyr.

"5 adam qamaýǵa alyndy. Atalǵan tulǵalardyń áreketinen 426 azamat zardap shekken.

Elorda qonaqtary men turǵyndaryna qurylys salýshyny tańdaýda abaı bolý kerektigin eskertemiz. Azamattardyń qarajatyn tartýǵa quqyǵy bar qurylys salýshylardyń tizimi www.egov.kz saıtynda kórsetilgen", - delingen Astana qalasy prokýratýrasy habarlamasynda.