Elimizde úlestik qurylysqa qatysý protsesi jetildiriledi
Qazaqstanda úlestik qurylysqa qatysý protsesi jetildiriledi. Bul týraly QR Ónerkásip jáne qurylys mınıstrligi qala qurylysy jáne turǵyn úı-kommýnaldyq saıasat departamentiniń dırektory Rýslan Lepesov aıtty, dep habarlaıdy QazAqparat tilshisi.
«Qazir úlestik qurylysqa qatysý protsesin jetildirý boıynsha zań jobasy Májiliste jatyr. Biz osy zań jobasy sheńberinde talap etý quqyǵyn tirkeý arqyly úlestik qatysý sharttarynyń barlyǵy ádilet organdarynda tirkeýden ótýdi qatańdatatyn túzetýler qosqymyz keledi. Ári qaraı biz barlyq tólemdi tek qolma-qol aqshasyz esep aıyrysýyn qalaımyz. Sonymen qatar, úleskerler qarajatyn tartýǵa ruqsaty joq jerde jarnamaǵa tyıym salǵymyz keledi», - dedi Rýslan Lepesov jýrnalısterdiń suraǵyna bergen jaýabynda.
Onyń aıtýynsha, qazir turǵyn úı satyp alýǵa kepildik bermeıtin aldyn ala brondaý sharttary úlken qaýip tóndirip otyr.
«Búginde jańa yqtımal problemalyq obektiler paıda bolyp jatyr, mundaı nysandar týyndamaýy úshin halyqty úlestik qatysý sharttaryn ǵana jasaıtyndaı retteýimiz qajet», - dep atap ótti Rýslan Lepesov.
Aıta keteıik, 2024 jyly 1 qańtarda zańsyz qurylysty boldyrmaýǵa baǵyttalǵan biryńǵaı qala qurylysy saraptamasy qoldanysqa enedi. ıAǵnı, barlyq joba keshendi qala qurylysynyń memlekettik saraptamasynan ótedi.
Sondaı-aq qala qurylysy jobalary bekitilmeı turyp qoǵamdyq talqylaýdan ótetin bolady.
