QQS-nyń 4 paıyzǵa artýy ár turǵynnyń qaltasyna 100 myń teńge salmaq salady
Qosylǵan qun salyǵynyń 4 paıyzǵa artýy jyl saıyn ár turǵynnyń qaltasyna 100 myń teńgege salmaq salady. Mundaı pikirdi sarapshy Maksım Baryshev bildirdi, dep habarlaıdy QazAqparat tilshisi.
«Biz zertteý júrgizdik. Zertteý máni – qosylǵan qun salyǵy mólsherlemesi kóterilýiniń Qazaqstannyń ár azamatyna qandaı teris saldarynyń bolatyndyǵyn túsiný. Bul zertteýdiń bazasy retinde Ulttyq ekonomıka vıtse-mınıstri Azamat Ámrınniń «qosylǵan qun salyǵy mólsherlemesin 12-den 16 paıyzǵa kóterý el bıýdjetine qosymsha 2 trln teńge túsim ákeledi» degen sózin aldyq. Zertteý matematıkalyq boldy. Túsindire keteıin. Qosylǵan qun salyǵy esebinen bıýdjet 2 trln teńgege ulǵaıady. QQS – bul janama salyq. Ony sońǵy tutynýshy taýarlardy, jumystardy nemese qyzmetterdi satyp alý barysynda tóleıdi. Qazaqstanda 20 mln turǵyn bar delik. Soǵan oraı Qazaqstannyń árbir turǵynynan ortasha eseppen alǵanda el bıýdjeti 100 myń teńge alynady», - dedi Maksım Baryshev «Atameken» UKP alańynda ótken kezdesýde.
Onyń atap ótýinshe, álemde QQS mólsherlemesi tómen, tipti múldem joq elder de bar. Máselen, ekonomıkalyq turǵyda eń damyǵan AQSh pen Japonııada QQS joq. Al Kanada men Birikken Arab Ámirlikterde QQS mólsherlemesi 5 paıyzdy, Qytaıda 13 paıyzdy, Qyrǵyzstan men Ózbekstanda 12 paıyzdy quraıdy.
«QQS mólsherlemesi úlken emes eń damyǵan jáne damýshy elderdi de ataýǵa bolady. Sondyqtan QQS mólsherlemesin kóterýdiń qajeti joq. Qazaqstan 12 paıyzdyq QQS mólsherlemesimen de jaqsy damydy. Bul mólsherleme elimizdegi bıznesmenderge de qolaıly edi», - dedi ol.
