Deklaratsııany ýaqtyly tapsyrmaǵandarǵa qandaı jaýapkershilik kózdelgen
Memlekettik kirister komıteti aktıvter men mindettemeler týraly deklaratsııany belgilengen merzimde usynbaǵan tulǵalarǵa qandaı jaýapkershilik kózdelgenin málim etti, dep habarlaıdy QazAqparat tilshisi.
Aıta keteıik, 2023 jylǵy 1 qańtardan bastap jalpyǵa birdeı deklaratsııalaýdyń ekinshi kezeńi bastalǵan. Onda aktıvter men mindettemeler týraly deklaratsııany (250.00-nysan) memlekettik mekemelerdiń, bıýdjettik uıymdardyń jáne kvazımemlekettik sektor sýbektileriniń shtattyq qyzmetkerleri, sondaı-aq olardyń jubaılary tabys etýge tıis bolatyn.
Mundaı uıymdarǵa azamattyq-quqyqtyq sıpattaǵy shart boıynsha qyzmet kórsetetin jeke tulǵalar jáne olardyń jubaılary (mundaı uıymdardyń shtattyq qyzmetkerleri bolyp tabylmaıtyn) 2023 jyly deklaratsııany tabys etpeıdi.
2023 jylǵy 15 qyrkúıekte jalpyǵa birdeı deklaratsııalaýdyń ekinshi kezeńiniń deklaratsııalaryn elektrondy túrde tapsyrý merzimi aıaqtaldy.
«Aktıvter men mindettemeler týraly deklaratsııany belgilengen merzimde usynbaǵan jaǵdaıda ákimshilik jaýapkershilik kózdelgen. Birinshi ret ýaqytyly tapsyrylmaǵany úshin eskertý jasalady. Eger osydan keıin buzýshylyq bir jyl ishinde qaıtalap jasalsa 15 AEK mólsherinde aıyppul salynady. Aktıvter men mindettemeler týraly deklaratsııada tolyq emes, anyq emes málimetterdi usyný úshin de ákimshilik jaýapkershilik qarastyrylǵan. Eger atalǵan buzýshylyq birinshi ret jasalyp, salyqtardyń eseptelýine ákep soqpasa, onda eskertý jasalady. Al eger osyndaı buzýshylyq eskertý jasalǵannan keıin bir jyl ishinde qaıtalansa, onda 3 AEK mólsherinde aıyppul salynady», - dep atap ótedim komıtetten.
