Lılııa Rah pen Jusan bank daýy: tárkilengen brend buıymdar qaıda ketti
Tanymal qazaqstandyq kásipker, sán sarapshysy jáne stılıst Lılııa Rahtyń Jusan bankpen sot protsesi jalǵasyp jatyr. Búgin elordada stılıstiń qorǵaýshysy Vıktorııa Melentsova brıfıng ótkizdi, dep habarlaıdy QazAqparat tilshisi.
Kásipker zańgeri ne deıdi
2017 jyly bank 4,7 mlrd teńgege jetetin barlyq qaryzdy merziminen buryn óteýdi talap etken.
«Sot sheshimi shyqqansha birde-bir tólem keshiktirilmegen, aı saıyn 145 myń AQSh dollary tólenip otyrǵan. Jalpy esepte 5,7 mln dollar nesıe ótelgen edi. 2017 jyly bank 4 mlrd 778 mln teńgeni merziminen buryn tóleýdi talap etti. Bul óte úlken soma, birden qaıtarý múmkin emes. Oǵan qosa, bank odan 3 mlrd 738 mln 635 myń teńgege kepil zatyn óndirip alǵan, bul Almatynyń ortalyǵyndaǵy 5,5 myń sharshy metr ǵımarat. Qalǵan bereshek 1 mlrd 40 mln teńge ekenine kelisim berdik. Bereshek esebine 1 mlrd 200 mln teńgege jyljymaly múlik (taýarlar) L. Rahtyń óz erkimen berildi, ony bank 759 415 056 teńgege baǵalady. Munyń bári tanymal dızaınerlerdiń baǵaly zattary edi, ondaǵy bir kostıýmnyń quny 2 mln teńgege jetetin», - dedi zańger Astanada ótken baspasóz máslıhatynda.
Osynyń bárin eskere kele, zańger qalǵan bereshek 500 mln teńgeden aspaýy kerektigin aıtýda.
V. Melentsovanyń sózinshe, bank qyzmetkerleri de, tipti Jusan Bank aktsıonerleri de Lılııa Rahtyń nesıe úshin qansha qaryzy baryn bilmeıdi.
«Odan keıin túsiniksiz jaıttar bastaldy. Ol kezde zań bankterge aýktsıondarǵa qatysýǵa ruqsat beretin. 2018 jyly bank qaryzdyń qaldyǵyn esepten shyǵarmaı, Lılııa Rah múlkin 50% jeńildikpen óziniń úlestes kompanııalaryna senimgerlik basqarýǵa berdi. 2,5 jyl boıy biz banktiń múlikti balansqa qabyldaýyn kúttik. Qazir de bank nesıe qujattamasyn berýden bas tartty jáne qansha qaryz qalǵany, esepten shyǵarylǵan soma týraly naqty aqparaty joq. Muny sot protsesi emes, zańdastyrylǵan reıd dep ataýǵa bolady. Eshkim qaryzdyń naqty mólsherin aıpaıdy, isker áıelden aqsha «saýýdyń» amaly», - deıdi Vıktorııa Melentsova.
Zańger tárkilengen múliktiń qaıda jiberilgeni týraly esh aqparattyń bolmaýy – qylmystyq quqyqbuzýshylyq ekenin jáne bul senip tapsyrylǵan bóten múlikti jymqyrý jáne urlaý retinde qarastyrylatynyn basa aıtty. Osyǵan baılanysty Bas prokýratýraǵa ásirese, alynǵan brendtik taýarlar boıynsha tolyq aýdıt júrgizý úshin hat daıyndalyp jatyr.
«Qaryz boıynsha Lılııa Rahty aqtaý maqsatym joq. Zattardy alyńyzdar, eger 30-50 mıllıon teńge qaryz qalsa, biz ony tóleımiz. Ol qazir resmı túrde baıer, qandaı da bir brendterdi jarnamalaýy múmkin, biraq ol jumys istemeıdi. Bankırler onyń Instagram-paraqshasynan kórgen dúnıelerdi Lılııanyń menshigi dep oılaıdy. Shyn máninde olaı emes. Qymbat jaldaý aqysyn da ózi tólemeıdi. Osy kúnge deıin alatyn dúnıeniń bári alyndy», - dedi Vıktorııa Melentsova.
Jusan Bank málimeti
Óz kezeginde «First Heartland Jusan Bank» AQ búgingi baspasóz máslıhaty týraly málimdeme jasady.
«Jusan Bank-tiń L. Rah hanymǵa qatysty talap-aryz boıynsha júrgizgen barlyq jumystary qoldanystaǵy zańnamaǵa sáıkes júzege asyrylýda. Bul jumystar onyń 2016 jyldan bastap bank aldyndaǵy banktik qaryz sharty boıynsha mindettemelerin oryndamaýynyń saldary jáne ol tıisti sottardyń sheshimderimen rastalǵan. Bank eń aldymen, óz klıentteri men salymshylarynyń múddesin eskere kele áreket etedi», - dep jazylǵan bank jaýabynda.
Sondaı-aq bank L. Rahtyń merzimi ótken bereshekti óteý sharttaryna qatysty syndarly talqylaý júrgizýge daıyn ekenin jetkizdi.
«Basqa da bank pen qaryz alýshy arasyndaǵy qarym-qatynastyń egjeı-tegjeıli derekteri – bank qupııasy týraly zańnamamen qorǵalatyn aqparat», - deıdi Jusan Bank.
