Soltústik Qazaqstan oblysy «korolin» izdep jatyr
Soltústik Qazaqstan oblysynda kúzdiń negizgi oqıǵasy – óńir ákiminiń taǵaıyndalýy bolmaq. Petropavl máslıhatynyń depýtaty, oblystyq qoǵamdyq keńes múshesi, zańger Pavel Afanasev ákim qyzmetine óńir ereksheligin jaqsy biletin, jergilikti sharýa adamy bolýy kerek dep esepteıdi, dep habarlaıdy QazAqparat tilshisi.
Pavel Afanasevtiń sózinshe, oblys týmasy bolý mindetti emes. Bastysy, osy óńirde uzaq jyl jumys istep, osynda memlekettik qyzmet atqarǵan azamat bolǵany abzal.
Ol jergilikti ahýaldy, ekonomıkasyn, bıýdjeti men qarjysyn jaqsy bilýi tıis. Turǵyndardyń suranysyn syrttan kelgenderden góri jergilikti kadr jaqsy biledi. Jergilikti turǵyn óńir ereksheligin biledi. Bul halyq sharýashylyǵy salasyndaǵy kásibı maman nemese ekonomıst, qarjyger, ónerkásippen aınalysatyn adam bolǵany durys. Turǵyndar senetin, halyq qalaýlylary tanıtyn, senim artatyn adam bolýy kerek. Ádemi sóıleıtin dıplomat bizge saı kelmeıdi. Óńirge jumysqa qabiletti, jaýapty jáne syıysyp ketetin adam qajet. Jańa basshy kelip, bárin ózine yńǵaıly etip ózgertkisi kelse – jumys júrmeıdi. Menińshe, oblys ákimdiginde komanda jasaqtalǵan, jańa ákim olardy ózine emes, ózin solarǵa saı etýi kerek, dep esepteıdi Pavel Afanasev.
Jańa óńir basshysyna máselesi kóp sharýa buıyraıyn dep tur. Sebebi óńirde isteıtin jumys, nátıje shyǵarýdy qajet etetin túıitkil jeterlik.
Aıaqtalmaǵan qurylys nysandary kóp. Keıingi eki jylda ınvestor sany azaıdy, iri jobalar joq. Kópbeıindi aýrýhana salynyp bitpeı jatyr. Petropavl áýejaıynyń dárejesi anyqtalǵan joq: halyqaralyq pa, joq pa? Aıtylyp jatqan kólik haby damymaı jatyr. Óńir shekaraǵa jaqyn bolǵanymen, logıstıka nashar damyǵan. Óndiris áleýetin arttyrý kerek. Bir kezderi bizdiń aımaq áskerı-óndiristik keshenmen, óndirispen tanymal bolǵan. Qazir bul sala bir jaqta qaldy. Oblys dotatsııalyq. Meniń esepteýim boıynsha, bıýdjet 73% respýblıkadan dotatsııa alady, tek 27% jergilikti kiris. Salyq salynatyn bazany damytý qajet. Іri blok – áleýmettik sala. Óńirde bolashaǵy kúmándi aýyldarda ornalasqan shaǵyn jınaqty mektep kóp. Bizge mektepti de, aýyldy da saqtap qalý mańyzdy. Qazaq tilinde bilim beretin mektepter jetispeıdi, kóp ǵımarat jóndeýdi qajet etedi. Jalpy aıtqanda, qaı salany alyp qarasaq ta másele jeterlik. Jańa ákimge jumys kóp. Bastysy beı-jaı qaramaıtyn adam bolsa eken, - dep tolyqtyrdy Pavel Afanasev.
Saıasattanýshy, PhD, ID-zertteý ortalyǵynyń dırektory Dına Aıkenovanyń aıtýynsha, bul qyzmetke úmitkerdiń aýyl sharýashylyǵynda tájirıbesi, sondaı-aq dıplomat jáne kommýnıkator qabileti bolǵany durys.
Soltústik Qazaqstan oblysy basshysyz otyrǵanyna eki aptadan asty. Keıingi jyly oblysta kóptegen kadrlyq ózgeris bolyp, tájirıbeli basshylar ketti: byltyr jeltoqsanda burynǵy óńir ákimi Qumar Aqsaqalov kórshi Qostanaı oblysyna aýysyp, qala ákimi qyzmetine taǵaıyndaldy. Sonymen qatar oblysta halyq sany kóp ári etnıkalyq quram kúrdeli bolǵandyqtan, sondaı-aq shekaralyq strategııalyq ahýal men klımat jaǵdaıyn eskersek, jańa kadrlardy halyqtyń qabyldaýy uzaqqa sozylady. Taǵaıyndaýdyń qıyndap jatqany da osyǵan baılanysty bolýy múmkin. Bul qyzmetke keletin úmitker aýyl sharýashylyǵynda tájirıbesi bar basqarýshy bolýy kerek, dıplomat jáne kommýnıkator qabiletteri bolǵany abzal. Ol reseılik saıasatkerlerdiń arandatýyna daıyn bolyp, oblys aýmaǵynan Reseı temir joly ótetinin eskerýi tıis. Budan bólek, Soltústik Qazaqstan astyǵyn tutynatyn Qytaı naryǵymen, M.Jumabaev atyndaǵy SQÝ-da tolyqtaı bir baǵyt pen pedagogter quramy qysqaryp, stýdentterdi qabyldaýda úmitti aqtamaǵan Arızona ýnıversıtetine baılanysty amerıkalyqtarmen jumys isteýi kerek.
Sońǵysy – ishki saıasat salasynda tájirıbeniń bolýy. Bul – oblystyń túrli ult ókilderimen jumys isteýde memleket ıdeologııasyn úılesimdi alǵa jyljytý úshin qajet.
Sonymen qatar taǵaıyndaýdyń uzaqqa sozylýy oblys shekarasy nemese onyń ataýynyń ınstıtýtsıonaldyq ózgeristerimen baılanysty bolýy yqtımal. Aqparat alańynda Petropavl qalasynyń nemese oblystyń ataýyn Qyzyljar dep ózgertý týraly daýly pikir jarııalanyp jatady. Qazaqstan táýelsizdik alǵaly SQO turǵyndarynyń sany 40% azaıdy, al halyqtyń ortasha jasy boıynsha eń kári oblysqa jatady, - dep túıindedi spıker.
Buǵan deıin oblys ákimi bolǵan Aıdarbek Saparov 4 qyrkúıekten bastap Aýyl sharýashylyǵy mınıstrligin basqaratynyn aıta keteıik.
