Jibek Qulymbetova kúrespeı-aq grepplıngten Azııa chempıony atandy
Qazaqstandyq belgili sportshy Jibek Qulymbetova Tashkentte kúrespesten grepplıngten Azııa chempıony atandy, dep habarlaıdy QazAqparat tilshisi.
J.Qulymbetovanyń ózi ınstagramdaǵy paraqshasynda jazǵandaı, bul birinshilikte oǵan qarsylas buıyrmaǵan.
Astana qalasynda djıý-djıtsýdan álem chempıonatynda tórt kezdesý ótkizip, jeńimpaz atanǵan ol arada birneshe kún ótkende Dýbaıdaǵy halyqaralyq jarysta úzdik shyqty.
«Dýbaıdaǵy dodadan keıin elge oralyp, azdaǵan demalys alamyn dep oılaǵan edim. Alaıda meni taǵy bir úlken jarys kútip tur eken. Ózbekstannyń astanasy Tashkentte grepplıng AIGA kúresinen Azııa chempıonaty ótetinin estidim. Sodan keıin demalysty ekinshi orynǵa qoıyp, el namysyn qorǵaý úshin oılanbastan «Sagadat Batyr – QTT» sport klýbynyń múshelerimen birge baryp, Azııa chempıonatyna qatysamyn dep sheshim qabyldadym. Jarysqa 16-17 jas aralyǵyndaǵylar arasynda 48 kg salmaq dárejesine tirkeldim. Eki qarsylasym bar edi, nege ekeni belgisiz, olar aıaq asty básekege qatysýdan bas tartty. Biraq alys jerden kelgen soń bos ketpeý úshin eresekter arasynda baq synap kóreıin dedim. Munda meniń 4 qarsylasym bolǵan edi. Biraq olar da sanaýly ýaqyt qalǵanda, basqa salmaq dárejesine aýysyp, taǵy da qarsylassyz qaldym. Sóıtip, kúrespeı-aq Tashkent qalasynda ótip jatqan grepplıng AIGA kúresinen eresekter arasynda Azııa chempıony atandym. Endi keremet kóńil-kúımen elge oralyp, mindetti túrde kishigirim demalys jasaımyn. Sebebi aǵzany demaldyrýymyz kerek. Sodan keıin jattyǵý zalyna oralyp, kelesi dodalarǵa daıyndyqty bastaıtyn bolamyn», - dep jazdy J.Qulymbetova.
Jibek Qulymbetova jaqynda Dýbaıda ótken djıý-djıtsýdan «AJP Tour Asia Continental Jiu-jitsu championship 2023 - Professional» halyqaralyq týrnırinde eki altyn jeńip aldy, tamyz aıynda Astanada ótken álem chempıonatynda jeńiske jetip, jeti dúrkin álem chempıony atandy.
Azııa chempıonatyna Jibekten bólek taǵy birneshe qazaqstandyq sportshy qatysty. Olardyń bári Almaty oblysynan Saǵadat Nurmaǵambetov atyndaǵy sport klýbynyń atynan óner kórsetti. Sportshylar 16 altyn, 9 kúmis jáne 10 qola medal jeńip aldy. Olardyń qatarynda grepplıngten UWW álem chempıony Samat Aıtpanbet te bar.
