Almaty ákimdigi kóshe jaryǵyna jaýapsyz qaraǵan kompanııamen shartty buzady
Almaty qalasy ákimdigi kóshe jaryǵyna kináli jaýapsyz kompanııamen shartty buzady, dep habarlaıdy QazAqparat tilshisi.
2018 jyly Almaty qalasynyń Energetıka jáne sýmen jabdyqtaý basqarmasy, sonymen qatar «Almaty Qala Jaryq» vedomstvolyq baǵynysty uıymy jeke áriptes – konsortsıýmmen «Almaty qalasynyń syrtqy jaryqtandyrýdy jańǵyrtý» jobasy boıynsha memlekettik-jekeshelik áriptestik (MJÁ) shartyn jasasqan. Konsortsıým quramynda «ABM-Vuilding 2007», «Elektroremont» JShS jáne «ABM-Project» JShS syndy úsh kompanııa bar.
«Kelisimshartqa sáıkes, jańǵyrtý jumystaryna baılanysty 2020 jyldan bastap aǵymdaǵy jóndeý jumysynyń kólemi 2,5 eseden astam kóbeıdi. Shart boıynsha jeke áriptes 2019-2023 jyldar aralyǵynda 8,1 mlrd teńge ınvestıtsııalaýǵa tıis boldy, al is júzinde olardyń tek bir bóligin ǵana saldy. Josparlanǵan ınvestıtsııalardyń oryndalmaýy qalanyń syrtqy jaryqtandyrý jelisin jańǵyrtý baǵdarlamasynyń oryndalmaǵanyn kórsetedi»,- dep habarlady «Almaty Qala Jaryq» kompanııasynan.
Operatsııalyq shyǵyndardyń ótemaqysy jyl saıyn jeke seriktestiń ótinishi boıynsha ósti: 2019-2023 jyldar aralyǵynda aǵymdaǵy jóndeýge arnalǵan shyǵystar 12,08 mlrd teńgeden 28,5 mlrd teńgege deıin jetti.
«Bul jekemenshik áriptes jumys istegen kezde qalanyń syrtqy jaryqtandyrý jelisiniń jaı-kúıiniń aıtarlyqtaı nasharlaǵanyn dáleldeıdi. Bul kezeńde aǵymdaǵy jóndeýge arnalǵan soma 16,5 mlrd teńgege artty, ıaǵnı bastapqy qunynan 2,3 ese kóp»,- dep atap ótti kompanııadan.
Jekeshe áriptes yntymaqtastyqtyń barlyq kezeńinde MJÁ nysandaryn jobalaý, jańǵyrtý jáne paıdalanýǵa berý jónindegi jumystardy oryndaý merzimderin birneshe ret buzǵan. Al keıbir jumys aqaýmen tapsyryldy ári olardyń konsortsıýmy ony der kezinde joımady.
«Energetıka basqarmasy jáne «Almaty Qala Jaryq» kompanııasy 2022 jyldyń basynan bastap shart boıynsha jumystardy oryndaý sapasy men merzimi boıynsha jazbasha túrde birneshe ret eskertý joldaǵan. Biraq qazirgi ýaqytta bul talaptar oryndalmady, kóptegen buzýshylyq joıylǵan joq. Bul qalada syrtqy jaryqtandyrý máselesin týdyrdy», - dedi «Almaty Qala Jaryq» basshysy Igor Mysık.
Spıkerdiń sózinshe, jaýapsyz jekeshe áriptespen shartty buzý úshin sotqa talap qoıý týraly sheshim qabyldandy. Almatydaǵy kóshe jaryǵyna qatysty jaǵdaıdy jaqsartý men qala kósheleriniń jaryqsyz qalmaýy úshin jaryqtandyrý jelileri aýdan ákimdikteriniń ıelegine ótedi.
