Sheteldikter Qazaqstan emhanalaryna qalaı tirkele alady
Astananyń qoǵamdyq densaýlyq saqtaý basqarmasy basshysynyń orynbasary Aınur Tóleýova shetel azamattarynyń Qazaqstanda medıtsınalyq kómek alý tártibin túsindirdi, dep habarlaıdy QazAqparat tilshisi.
«Budan bylaı Eýrazııa ekonomıkalyq odaǵyna múshe memleketterden kelgen eńbek mıgranttary emhanaǵa tirkelý úshin erikti medıtsınalyq saqtandyrý polısin satyp alatyn boldy. Olar emhananyń tirkeý bólimine baryp, ótinish jazýy kerek. Azamattyǵy joq, Qazaqstanǵa ýaqytsha nemese bas saýǵalap kelgender de erikti medıtsınalyq saqtandyrý týraly kelisimshart negizinde alǵashqy medıtsınalyq-sanıtarlyq kómek kórsetetin uıymǵa tirkeledi. Atalǵan kelisimshart kúshi joıylǵanda olar da medıtsınalyq uıymnan avtomatty túrde shyǵarylyp otyrady», - dep túsindirdi A. Tóleýova Astana kommýnıkatsııalar qyzmetinde ótken brıfıngte.
Spıkerdiń aıtýynsha, alǵashqy medıtsınalyq-sanıtarlyq kómek kórsetetin uıymǵa júgingende mamandar tirkeý týraly ótinishti medıtsınalyq aqparattyq júıege jiberedi.
Tirkeý týraly ótinish nemese naqty sebebi bar bas tartý sheshimi 1 jumys kúni ishinde qabyldanady. Bul memlekettik qyzmet Elektrondy úkimet portalynda kórsetiledi.
Aıta keteıik, jyl saıyn elimizde 15 qyrkúıekten 15 qarashaǵa deıin emhanany erkin tańdaý naýqany ótedi.
Azamattar óziniń turǵylyqty shegi boıynsha emhanalardyń birin tańdaı alady. Patsıent qyzmetter paketin 2024 jyldyń 1 qańtarynan bastap ala bastaıdy, ıaǵnı 31 jeltoqsanǵa deıin buryn tirkelgen emhanaǵa qaralýdy jalǵastyrady.
Sondaı-aq, naýqas basqa eldimekende (issaparda, qonaqta) aýyryp qalsa, shuǵyl medıtsınalyq kómek alý úshin jaqyn mańdaǵy medıtsınalyq uıymǵa júgine alady nemese jedel medıtsınalyq járdem brıgadasyn shaqyra alady.
