Hanchjoýdaǵy Azııa oıyndarynda Qazaqstan Týy kóterildi

Qazaqstannyń sport delegatsııasy resmı túrde Hanchjoýdaǵy (QHR) jazǵy Azııa oıyndaryna bardy, dep habarlady QazAqparat Ulttyq Olımpıadalyq komıtetke silteme jasap.

Qazaqstan Týynyń saltanatty kóterilý rásiminiń búgin, 21 qyrkúıekte ótýi eldiń sport delegatsııasy Azııa oıyndaryna resmı barǵanyn bildiredi.

«Búgin Hanchjoýda Azııa oıyndarynda saltanatty jaǵdaıda elimizdiń týy kóterildi. Keıbir sport túrlerinde irikteý kezeńi bastalyp ketti. Alda bizdi medaldar úshin qyzý kúres kútip tur. Qazirgi ýaqytta Hanchjoýda bizdiń 200-den astam sportshymyz ornalastyryldy. Sportshylarymyzdyń jattyǵýy jáne ornalastyrylýy úshin qajetti jaǵdaı jasalynǵan. Týyndaǵan máseleler olımpıadalyq shtabtyń jumys kezeńimen sheshimin taýyp jatyr», - dedi Ulttyq Olımpıadalyq komıteti sport departamentiniń dırektory Elsııar Qanaǵatov.

Júzýden Qazaqstan komandasynyń kóshbasshylarynyń biri jáne el rekordshysy Ádilbek Mýsın sportshylar úshin týdy kóterý rásiminiń mańyzyn atap ótti.

«Týdy kóterý bul oıynnyń bastalǵanyn aıǵaqtaıdy jáne qazaqstandyq delegatsııanyń oıyndarǵa kirýin bildiredi. Biz úshin, Tý – tek memlekettik rámiz ǵana emes, ol bizdiń Otanymyz Qazaqstandy beıneleıtin, bizdi qashanda jeńiske jeteleıtin basty nyshanymyz!» - dedi ol.

Hanchjoýda Azııa oıyndary 23 qyrkúıekte bastalady. Jarys 54 arenada ótedi.

Komandalardyń ıeliginde 31 jattyǵý bazasy bolady. Qazaqstan quramasynda 525 sportshy bar, olar sporttyń 30 túrinen synǵa túsedi. Onyń 27-si –olımpıadalyq sport túri.

Osydan keıin toǵyz sport túrinen Parıjde ótetin 2024 jylǵy Olımpıadaǵa qatysýǵa lıtsenzııa alady: boks, sadaq atý, qazirgi bessaıys, júzý, kórkem júzý, breıkıng, kógaldaǵy hokkeı, tennıs, jeńil atletıka.