Osy zalǵa jınalǵan memleket basshylary adamzattyń bolashaǵyna jaýapty – Prezıdent BUU minberinen
Birikken Ulttar Uıymy Bas Assambleıasynyń 78-sessııasynda sóz sóılegen Prezıdent Qasym-Jomart Toqaev Qaýipsizdik keńesinde orta derjavalar men damýshy elderdiń daýysy tıisti deńgeıde estilýi kerek ekenin málim etti, dep habarlaıdy QazAqparat tilshisi.
«Qazaqstan Birikken Ulttar Uıymynyń jarǵysynda kórsetilgen prıntsıpterdi qatań ustanatynyn taǵy da atap ótkim keledi. Osy zalǵa jınalǵan memleket basshylary adamzattyń bolashaǵyna jaýapty. Shıelenisterdi kúshpen retteý - máseleni tek tyǵyryqqa tireıdi. Sondyqtan dıalog – bul jańa prıntsıpter men normalar jaıly ýaǵdalasýǵa qolaıly orta qalyptastyrýdyń eń jalǵyz joly. Áli kúnge deıin álemniń kóptegen elinde qaqtyǵys jaǵdaılary saqtalyp otyr. Osy oraıda biz shıelenisterdi dıplomatııalyq jolmen sheshý bastamasyn qoldaımyz. Bul rette Qazaqstan túrli álem elderiniń Ýkraınadaǵy daǵdarysty retteýge baǵyttalǵan tyń usynystaryn joǵary baǵalaıdy», - dedi Prezıdent sessııanyń jalpy debatynda sóılegen sózinde.
Memleket basshysy shıelenisti jaǵdaılardy sheshý úshin elder birlesip, bir-birin habardar ete otyryp áreket etý qajettigin atap ótti.
«Biz bul máselelerdi Qaýipsizdik keńesiniń reformasy arqyly ǵana sheshe alamyz. Bul - zaman talaby. Men keńeste orta derjavalar men damýshy elderdiń daýysy shyǵýy kerek jáne olar tıisti deńgeıde estilýi kerek dep senemin. Qaýipsizdik keńesi túıtkildiń sheshimin tabýy úshin túrli elder men ınstıtýttardyń pikirin eskerýi qajet. Osy oraıda beıbitshilikti saqtaý men qaýipsizdik máselelerinde Qazaqstan asa belsendi ról atqara alady», - dep usynys bildirdi Memleket basshysy.
