Kókshetaýda qarjy pıramıdasyn qurǵan eki jigit 5 jylǵa sottaldy

Aqmola oblysynyń eki turǵyny Kókshetaý qalasynda qarjy pıramıdasynyń keńsesin uıymdastyryp, basqaryp otyrǵan. Olarǵa aldanǵan 40 adam 2021 jylǵy qarasha men 2022 jylǵy sáýir aralyǵynda 39 mıllıon teńgesin qarjy pıramıdasyna salǵan, dep habarlaıdy QazAqparat tilshisi Aqmola oblystyq sotynyń baspasóz qyzmetine silteme jasap. 

Vedomstvonyń málimetinshe, qarjy pıramıdasyn uıymdastyrýshylarǵa Kókshetaý qalalyq sotynda úkim shyqty. Іs Qylmystyq kodekstiń 217-babynyń 3-bóligi 2-bólimshesi aıasynda qaraldy. 

Sotta anyqtalǵandaı, sottalýshylar áleýmettik jelilerde úlken tabys, saıahat jasaý jáne avtokólik satyp alý týraly aqparatty belsendi túrde jarnamalaǵan, prezentatsııa, trenıngter ótkizip, azamattardy kompanııaǵa tartqan.

Olar azyq-túlik, taýarlar, saıahatshy kartalaryn satýmen aınalysyp, azamattarǵa tirkelgeni úshin aqshalaı tólemder túrinde bonýstar usynǵan. Azamattardyń zańdy jáne qarjylyq saýatsyzdyǵyn, ońaı aqsha tabý nıetin paıdalanyp, qaryz, nesıe alýǵa ıtermelegen.

Olardyń qylmysy jábirlenýshilerdiń jáne kýágerlerdiń aıǵaqtarymen, sottalýshylardyń turǵylyqty jerin, keńsesin tintý jáne tekserý kezinde alynǵan qujattar jáne zattarmen, bank qujattarymen, aqsha qozǵalysy týraly málimettermen, sottalýshylardyń jábirlenýshilermen betpe-bet stavkasynyń hattamasymen, telefonda sóılesý stenogrammasymen jáne istiń basqa da materıaldarymen rastaldy. 

Sottalǵandarǵa jaza taǵaıyndaý kezinde sot olardyń jasaǵan qylmysyna shyn ókinýin, aýyrlatatyn mán-jaıdyń joqtyǵyn, buryn sottalmaǵanyn eskerdi.

Tergeý barysynda kináliler qarjy pıramıdasyna salynǵan aqshany ıelerine qaıtardy.

«Sot úkimimen eki sottalýshy da uıymdarda basshylyq laýazym atqarý quqyǵynan aıyryla otyryp, árqaısysy 5 jylǵa bas bostandyǵynan aıyryldy. Sot úkimi zańdy kúshine engen joq», — dedi Aqmola oblystyq sotynyń baspasóz qyzmetinen.

Aıta ketsek, budan buryn Stepnogorda mekteptiń bas býhgalteri bir jylda 36 mln teńge jymqyrǵanyn jazǵan edik.