Qazaqstanda múgedektigi bar jandarǵa qandaı jeńildikter bar
Eńbek jáne halyqty áleýmettik qorǵaý mınıstrligi eldegi múgedektigi bar jandarǵa qandaı qoldaý sharalary qarastyrylǵanyn aıtyp berdi, dep habarlaıdy QazAqparat tilshisi.
«Múgedektigi bar jandardyń quqyqtary 2023 jylǵy 20 sáýirde bekitilgen QR Áleýmettik kodeksinde aıqyndalǵan. ıAǵnı Qazaqstanda múgedektigi bar adamdar áleýmettik qorǵalýǵa, mektepke deıingi tárbıe alý men oqý, bilim alý úshin jaǵdaılarmen qamtylýǵa, QR zańnamasynda aıqyndalatyn tártippen mindetti áleýmettik medıtsınalyq saqtandyrý júıesindegi jáne kepildik berilgen tegin medıtsınalyq kómekke, arnaýly áleýmettik qyzmettiń kepildik berilgen kólemine tolyq quqyly», - dep jaýap berdi mınıstrlik agenttiktiń resmı saýalyna.
Vedomstvonyń habarlaýynsha, múgedektigi bar jandar kásiptik jáne qaıta daıarlyqqa, jumysqa ornalasýǵa, ınfraqurylym jáne aqparattandyrý obektilerine, kólikke, aqparatqa, oıyn-saýyq jáne mádenı-buqaralyq is-sharalarǵa, sporttyq saıystar men kórsetiletin memlekettik qyzmetterge, óziniń saılaý jáne saılaný quqyǵyn júzege asyrýǵa, QR turǵyn úı zańnamasyna sáıkes baspanaǵa, memlekettik jáne ózge uıymdarda birinshi kezekte qyzmet alýǵa, QR Konstıtýtsııasynda jáne basqa da zańnamalyq aktilerinde bekitilgen jeke basynyń quqyqtary men bostandyqtaryna tolyq ıe bolady.
Osylaısha, respýblıkalyq bıýdjetten memlekettik áleýmettik járdemaqylar, ońaltýdyń tehnıkalyq quraldarymen (protezdik-ortopedııalyq kómek, tehnıkalyq kómekshi quraldar, júrip-turý quraldary) jáne qyzmetterimen (jeke kómekshi, ymdaý tili mamany, sanatorıı-kýrorttyq emdeý) qamtamasyz etiledi.
Odan bólek, jergilikti atqarýshy organdar múgedektigi bar adamdarǵa áleýmettik kómek kórsetedi, onyń ishinde kommýnaldyq tólem aqysyn ótep berý, qalalyq kólikte tegin júrý kiredi.
Sonymen birge, QR Áleýmettik kodeksine sáıkes, jergilikti atqarýshy organdar aýyr jumystardaǵy, eńbek jaǵdaılary zııandy, qaýipti jumys oryndaryn esepke almaǵanda, múgedektigi bar adamdar úshin jumys oryndarynyń 2-4% deıingi mólsherde jumys oryndaryna kvota belgileıdi.
