Mas bolyp, kólik aıdaǵan depýtattyń isi sotta qaralady

Aqtóbe qalalyq máslıhatynyń depýtaty kólikti mas kúıinde júrgizgeni úshin jaýapqa tartylady. Qazirgi kezde Ákimshilik quqyqbuzýshylyq týraly kodekstiń 2 baby boıynsha is qozǵaldy, dep habarlaıdy QazAqparat tilshisi.

Aqtóbe qalalyq máslıhatynyń depýtaty Sanııa Muratova qaladaǵy S.Báıishev kóshesinde jol qozǵalysy erejelerin buzǵan. Ol «Lexus» avtokóligin mas kúıinde júrgizgen.

Polıtsııa 53 jastaǵy áıeldiń kóligin toqtatqan. Qujattaryn tekserý kezinde júrgizýshiden alkogoldiń ıisi shyǵyp turǵany baıqaldy. Júrgizilgen saraptama nátıjesi onyń alkogoldi mas kúıde bolǵanyn kórsetti. Júrgizýshige QR Ákimshilik quqyqbuzýshylyq týraly kodekstiń 596-babynyń 3-bóligi (Kólik quralyn joldyń júrý bóliginde ornalastyrý, qarsy júrip ótý nemese basyp ozý qaǵıdalaryn buzý) jáne 608-babynyń 1-bóligi (Kólik quralyn mas kúıde júrgizý) boıynsha hattama toltyrylyp, materıal jınaldy jáne zańdy sheshim qabyldaý úshin ákimshilik sotqa jiberiletin bolady,- dep habarlady oblystyq Polıtsııa departamentiniń baspasóz qyzmetiniń jetekshisi Erbolat Sarqulov.

Sot kabınetinen Muratova Sanııa Bulqaıyrqyzyna qatysty is sýdıa D.Hamıevke túskenin, negizgi sot otyrysy bastalǵanyn kórýge bolady.
Aıta keteıik, kólik quralyn mas kúıde basqarǵany úshin 15 táýlikke ákimshilik qamaqqa alý jáne kólik quralyn basqarý quqyǵynan 7 jyl merzimge aıyrý kózdelgen. Bul baptyń sanktsııasynda jazanyń ózge túri qarastyrylmaǵan.