30 gradýs aıaz: SQO-da antıtsıklon áserinen aldaǵy úsh kún aıazdy bolmaq

PETROPAVL. KAZINFORM — Soltústik Qazaqstan oblysynda aýa raıy buzylyp, birneshe aýdanda joldar jabyldy.

«QazAvtoJol» AQ málimetinshe, búgin túske taman «Ekaterınbýrg-Almaty» respýblıkalyq avtojolynyń 834-856 shaqyrym aralyǵy, ıaǵnı Chıstopole aýyly men Aqmola oblysynyń shekarasy jáne «Jezqazǵan-Petropavl» avtojolynyń 595-673 shaqyrym aralyǵy — Aqmola oblysynyń shekarasynan Toqsan bı aýyly aralyǵy jabyldy.

Kólik qozǵalysyna qoıylǵan shekteýdi 22 qańtar saǵat 06:00–de alý josparlanǵan. 

Qazir óńirdiń keı aýdandarynda qar jaýyp, boran uıytqyp tur. Osyǵan baılanysty Aıyrtaý jáne Ǵ.Músirepov atyndaǵy aýdandarda oblystyq mańyzdaǵy joldar jabylǵan. 

Qolaısyz aýa raıyna baılanysty Polıtsııa departamenti de eskertý jarııalap, júrgizýshilerden jolda asa saq bolýdy, jyldamdyq rejımin, tıisti araqashyqtyqty saqtaýdy, múmkindiginshe alys saparǵa shyqpaýdy eskertti.

Al erteń SQO-da aýa temperatýrasy kúndiz -25-28 gradýsqa deıin jetpek. Ekpini 23-28 m/s jetetin jel turyp, qalyń qar jaýmaq. Sınoptıkterdiń málimetinshe, qolaısyz aýa raıy aldaǵy úsh kún boıy saqtalmaq.

— Qazir óńir atlantıkalyq tsıklonnyń áserinde. Biraq túnde ol antıtsıklonǵa aýysyp, aıaz turady. Aldaǵy úsh táýlik boıy túnde synap baǵany -30 gradýsty kórsetse, kúndiz -28-ge deıin túsedi. 24 qańtarda aıaz synyp, kúndiz -15-20 gradýs bolmaq, — deıdi «Qazgıdromet» RMK SQO fılıalynyń bólim basshysy Gúlzat Ǵazızova.

Mamannyń aıtýynsha, aıazdy kúnder kóp turmaıdy. Jalpy 2024 jyldyń jeltoqsan aıy 1978 jylǵy rekordty jańartyp otyr, buǵan deıin osy aıdaǵy eń jyly kún +0,8 gradýsty kórsetse, 19 jeltoqsanda aýa temperatýrasy +1,3 gradýs bolǵan. Aıdaǵy ortasha temperatýra 8-9 gradýs aralyǵynda tirkeldi, bul jyldyq ortasha kórsetkishten 4-6 gradýsqa joǵary.

Buǵan deıin SQO-da bank shotyn bireýlerge paıdalanýǵa bergen turǵyn endi keltirilgen shyǵyndy ózi óteıtindigin jazǵan edik.