Qazaqstan jáne Rýmynııa Іskerlik keńesiniń jumysyn jandandyrý kerek – QR Prezıdenti

Memleket basshysy Rýmynııa Prezıdenti Klaýs Iohannıspen kelissóz júrgizdi, dep habarlaıdy QazAqparat Aqordanyń baspasóz qyzmetine silteme jasap.

Memleket basshysy Qazaqstan men Rýmynııa arasyndaǵy saýda-ekonomıkalyq baılanystardyń qarqyndy damyp kele jatqanyn atap ótti.

Rýmynııa – Qazaqstannyń Shyǵys Eýropadaǵy jetekshi saýda seriktesi.

Búginde ekijaqty saýda-sattyq kólemi 20 paıyzǵa artyp, 1,3 mıllıard dollarǵa jetti.

– Biz Rýmynııany dostas memleket retinde qarastyramyz. Sizdiń eldiń tarıhyna, júrgizip otyrǵan saıasatyńyzǵa jáne halqyńyzdyń dástúrine qurmetpen qaraımyz, – dedi Qasym-Jomart Toqaev.

Memleket basshysy saýda-ekonomıkalyq qarym-qatynastarǵa tyń serpin berý úshin Úkimetaralyq komıssııanyń, Qazaqstan jáne Rýmynııa Іskerlik keńesiniń jumysyn jandandyrý kerek ekenin aıtty.

Klaýs Iohannıs Qazaqstan men Rýmynııa arasyndaǵy eki jaqty yntymaqtasty odan ári damytýǵa nıetti ekenin jetkizdi

– Men jáne meniń komandam búgin sizdermen osy jerde kezdeskenimiz úshin qýanyshtymyz. Óıtkeni biz senimdi ekonomıkalyq jáne saıası seriktes eldermiz. Osy kezdesý aldynda memleketterimizdiń ózara qarym-qatynasynyń tarıhymen tanystym. Sizben saıası dıalogty joǵary deńgeıde nyǵaıtýǵa zor múmkindik bar dep oılaımyn, – dedi Rýmynııa Prezıdenti.

Taraptar halyqaralyq kún tártibindegi máseleler jóninde, sondaı-aq BUU jáne EQYU aıasyndaǵy ózara yqpaldastyq jaıynda pikir almasty.

Kezdesý sońynda Qasym-Jomart Toqaev Klaýs Iohannısti Astana halyqaralyq forýmyna negizgi qonaqtardyń biri retinde qatysýǵa shaqyrdy.