Kaspıı teńizi tartylyp, florasy men faýnasy lastanyp jatyr - BUU
Birikken Ulttar Uıymy Bas Assambleıasynyń 78-sessııasynda sóz sóılegen Prezıdent Qasym-Jomart Toqaev Ortalyq Azııadaǵy sý tapshylyǵy máselesi ózekti bolyp otyrǵanyn aıtty, dep habarlaıdy QazAqparat tilshisi.
«Bizdiń aımaqtaǵy sý tapshylyǵynan transshekaralyq ózender basseıninde kúrdeli ekonomıkalyq jáne basqa da máseleler týyndap otyr. Mundaı jaǵdaı búkil álemde baıqalady. 2040 jylǵa qaraı sýǵa jahandyq suranys usynystan 40 paıyzǵa asyp ketýi múmkin. Sondyqtan biz klımattyń ózgerýine qarsy kúres jónindegi sharalarmen birge osy bir mańyzdy jahandyq máseleni sheshý úshin saıası kúsh-jigerimiz ben ekonomıkalyq resýrsymyzdy jumyldyrýymyz kerek. Kelesi jyly Qazaqstan Halyqaralyq Araldy qorǵaý qoryna tóraǵalyq etedi. Biz qorshaǵan ortanyń odan ári tozýyna jol bermeý jáne bir kezderi planetamyzdaǵy aýmaǵy jóninen tórtinshi orynda turǵan kóldiń aınalasyndaǵy tirshilikke keri áserin boldyrmaý jumystaryn jalǵastyramyz», - dedi Prezıdent.
Atalǵan máseleni kótere kele Memleket basshysy Kaspıı teńiziniń búgingi ahýalyn baıandady.
«Qazir álemdegi eń iri kól – Kaspıı teńizi de sýynyń tartylýy, sý arnalarynyń burylýy, florasy men faýnasynyń lastanýy sııaqty ekologııalyq máselelermen betpe-bet kelip otyr. Kaspıı teńizin qutqarý máselesi uzaqmerzimdi halyqaralyq yntymaqtastyqty qajet etetin ortaq basymdyqqa aınalýy kerek», - dep toqtaldy Qasym-Jomart Toqaev.
Buǵan qosa Memleket basshysy BUU zalyna jınalǵan memleket basshylary adamzattyń bolashaǵyna jaýapty ekenin basa aıtty.
Sonymen qatar, Qasym-Jomart Toqaev qazirgi geosaıası jaǵdaılarǵa qaramastan bizdiń qoǵam men Úkimet Ádiletti Qazaqstan quryp jatqanyn atap ótti.