Prezıdent BUU minberinen Quran kitapty órteý áreketterine qatysty málimdeme jasady

Birikken Ulttar Uıymy Bas Assambleıasynyń 78-sessııasynda sóz sóılegen Prezıdent Qasym-Jomart Toqaev Quran kitapty órteý áreketterine qatysty pikir bildirdi, dep habarlaıdy QazAqparat tilshisi.

«Jýyrda qasıetti kitaptarǵa qurmetsizdik tanytý aktileri boldy. Biz osy jaǵdaıǵa alańdaýshylyq bildiremiz. Islamǵa jáne basqa da dinderge qatysty jasalǵan mundaı taǵylyq áreketterden erkindiktiń, sóz bostandyǵynyń jáne demokratııanyń nyshany bilinbeıdi. Quran sekildi qasıetti kitaptardyń bári vandalızmnen quqyqtyq turǵyda qorǵalýǵa tıis», - dep pikir bildirdi Prezıdent.

Bul rette Memleket basshysy keler jyly ótetin Bolashaq sammıtinde Qazaqstan qoldaýshy rólin atqaratynyn atap ótti.

«Biz Bas hatshy usynǵan «Beıbitshiliktiń jańa kún tártibin» qoldaımyz. Bul strategııalyq qujat álemde beleń alǵan senimsizdik pen óshpendilikke qarsy turýy kerek. Qazaqstan kelesi jyly ótetin Bolashaq sammıtinde Bolashaq paktisin qabyldaý isinde syndarly jáne qoldaýshy rólin atqarady. Biraq qarý-jaraqqa tyıym salýmen nemese deklaratsııaǵa qol qoıýmen ǵana beıbitshilik ornamaıdy. Beıbitshilik mádenıetin qalyptastyrýda dinaralyq jáne konfessııaaralyq dıalog mańyzdy ról atqarady», - dedi Prezıdent.

Buǵan qosa Prezıdent BUU zalyna jınalǵan memleket basshylary adamzattyń bolashaǵyna jaýapty ekenin basa aıtty.

Sonymen qatar, Qasym-Jomart Toqaev qazirgi geosaıası jaǵdaılarǵa qaramastan bizdiń qoǵam men Úkimet Ádiletti Qazaqstan quryp jatqanyn atap ótti.