Ázerbaıjan Qarabaqta antıterrorlyq sharalar bastaǵanyn habarlady

Ázerbaıjan Respýblıkasynyń Qorǵanys mınıstrligi Qarabaq óńirinde jergilikti deńgeıde antıterrorlyq sharanyń jalǵasyp jatqanyn málimdedi. Al, Armenııanyń Syrtqy ister mınıstrligi Ázerbaıjan tarapynyń ustanymyn aımaqtaǵy jańa áskerı shıeleniske dıplomatııalyq daıyndyq retinde baǵalady, dep habarlaıdy QazAqparat tilshisi. 

Ázerbaıjan tarapy ne deıdi?

Ázerbaıjan Qorǵanys mınıstrliginiń málimeti boıynsha, shara aıasynda joǵary dáldikti qarý qoldaný arqyly tek zańdy áskerı nysandar men áskerı ınfraqurylym isten shyǵarylady.

Ázerbaıjan Respýblıkasynyń bıligi Armenııanyń qarýly kúshterine qarasty qurylymdar turǵyn alaptaryna jaqyn jerde atys quraldaryn jaıǵastyryp jatqanyn aıtyp otyr. Osyǵan baılanysty eldiń Qorǵanys mınıstrligi azamattyq qatardaǵy jergilikti turǵyndardy áskerı nysandardan aýlaq bolýǵa jáne Armenııa qarýly kúshteriniń qurylymdaryn qoldamaýǵa shaqyrdy.

«Mundaı aqparat Ázerbaıjannyń Qarabaq óńirindegi armıan turǵyndaryna mobıldi SMS-servıs arqyly taratyldy. Buǵan qosa, halyqqa daýys zoraıtqysh quraldar arqyly da habar aıtylyp, únparaqtar taratylyp jatyr. Ákimshilik, áleýmettik, bilim berý, medıtsınalyq, dinı jáne basqa nysandarda kúzet uıymdastyrylady. Olardyń bári Ázerbaıjan zańnamasy jáne halyqaralyq gýmanıtarlyq quqyq normalary boıynsha qorǵaýǵa alynady. Áıelder men balalarǵa, egde adamdarǵa, sondaı-aq múgedektigi bar adamdar men naýqastarǵa qajetti medıtsınalyq kómek kórsetilip, aýyzsýmen jáne azyq-túlikpen qamtamasyz etiledi», - delingen Qorǵanys vedomstvosynyń málimetinde.

Sondaı-aq, vedomstvodaǵylar halyqty qaýipti aýmaqtardan evakýatsııalaý úshin Lashyn jolynda jáne basqa da baǵyttarda gýmanıtarlyq dálizder men qabyldaý beketteri uıymdastyrylatynyn aıtyp otyr.

Armenııa ne deıdi?

Armenııanyń Syrtqy ister mınıstrligi de Ázerbaıjan Syrtqy ister mınıstrliginiń dıplomatııalyq korpýs ókilderi 18 qyrkúıektegi kezdesýde aıtqan ustanymdaryna baılanysty málimdeme jasady.

Armenııa Syrtqy ister mınıstrliginiń paıymdaýynsha, bul ustanymdar aımaqtaǵy jańa áskerı shıeleniske, Qarabaqta etnıkalyq tazartý júrgizýdi kózdeıtin naqty áreketterge dıplomatııalyq daıyndyq sııaqty kóringen.

Armenııa bıliginiń málimetinshe, Ázerbaıjan ókilderi elde akkredıttelgen sheteldik dıplomattarmen ótken kezdesýde Armenııa Respýblıkasy shıelenisti báseńdetýge baǵyttalǵan usynystardyń bárin qabyldamaǵanyn aıtqan. Armenııa taraby Ázerbaıjannan eshbir resmı usynys túspegenin alǵa tartyp otyr.

«Ázerbaıjan-Armenııa shekarasynan áskerdi áketý týraly usynys kúshinde ekenin aıtý kerek dep esepteımiz. Armenııa Respýblıkasy osy bastamany iske asyrýǵa qysqa merzimde kirisýge daıyn», - dep málimdedi Armenııanyń Syrtqy ister mınıstrligi.

Armenııa Syrtqy ister mınıstrligi Ázerbaıjan tarapynyń «Armenııa Qarabaqta rejım ornatqany» týraly málimetin ótirik dep atady.

Olardyń málimdeýinshe, Armenııanyń Qarabaqqa kórsetip jatqan kómegi gýmanıtarlyq sıpatta ǵana. Lashyn dálizi zańsyz buǵattaldy dep esepteıtin aımaqqa osy sebeppen kómek qolyn sozǵanyn málimdep otyr.

Ázerbaıjannyń dálizdi buǵattaýyn zańsyz dep málimdegen Armenııanyń Syrtqy ister mınıstrligi Taýly Qarabaqta BUU qurylymdary men ózge de halyqaralyq seriktesterdiń kirip-shyǵýyn qıyndatyp, gýmanıtarlyq daǵdarys týyndatyp otyrǵanyna senimdi. Lashyn dálizindegi qozǵalystan bólek Qarabaqqa Ázerbaıjannan jetkiziletin gaz da toqtap qalǵan.

«Qarabaqta Armenııa Respýblıkasynyń armııasy joq. Al, Armenııanyń Ázerbaıjan aýmaǵyn mınalaǵany týraly jalǵan málimdemeler Halyqaralyq sottyń 22 aqpandaǵy qaýlysymen teristelgen. Armenııa tarapy kórshi elge qarsy agressıvti áreket jasaýǵa nıetti emes ekenin, al áskerı reformalar óz aýmaǵynyń qaýipsizdigi úshin qabyldanyp jatqanyn birneshe ret málimdedi. Qarabaqtyń aınalasyna kelsek, Baký-Stepanakert dıalogin shıelenisti báseńdetý quraly retinde qarastyramyz», - delingen Armenııa Syrtqy ister mınıstrliginiń málimdemesinde.

Shıelenis shejiresi

Qarabaq shıelenisi 1988 jyldan beri jalǵasyp keledi. Sonyń ishinde 2 ret joıqyn qaqtyǵyspen este qaldy. Birinshi Qarabaq soǵysy 1992-94 jyldary bolsa, Ekinshi Qarabaq soǵysy 2020 jyly qaıta tutanǵan.

Armenııa da, Ázerbaıjan da Qarabaqty óz aýmaǵy dep sanaıdy. Ahýal 2022 jyly Lashyn dálizindegi qozǵalys shektelgen tusta qaıta ýshyqqan.

Sheteldik BAQ-tyń málimeti boıynsha, eki soǵys kezinde qos taraptan 32 myńdaı adam qaıtys bolǵan. Myńdaǵan adam is-tússiz joǵaldy dep esepteledi.