Aýstrııalyqtar qoǵamdyq kólikte «klımattyq bıletpen» júredi

Aýstrııada kez kelgen qoǵamdyq kólikpen júrýge múmkindik beretin «klımattyq bıletke» jyldyq abonement bar. Jospar boıynsha, bul jeke kólik qunynan áldeqaıda arzan bolmaq, dep habarlaıdy QazAqparat Euronews-ke silteme jasap.

Aýstrııa bıligi turǵyndaryn qorshaǵan ortaǵa zııan keltirýdi azaıtý maqsatynda qoǵamdyq kólikke minýge shaqyrdy.

Ol úshin halyqqa «Klımattyq bılet» (KlimaTicket) – búkil el boıynsha poıyz, avtobýs, tramvaı jáne metrony shekteýsiz paıdalanýǵa múmkindik beretin jol júrý bıletiniń jyldyq abonementi usynyldy.

Eresek abonement quny – jylyna 1095 eýro, bul qaıta eseptegende kúnine úsh eýro degen sóz. Janar-jaǵarmaı baǵasynyń kóterilýi aıasynda kópshilik muny jaqsy kelisim dep sanap otyr.

Aýstrııada «klımattyq bılettiń» satylyp jatqanyna eki jyldaı ýaqyt boldy. Biraq búginde ony turǵyndardyń tek 3%-y satyp alǵan.

Aýstrııalyqtar Eýroodaq elderinde basqalarǵa qaraǵanda poıyzdardy jıi paıdalanatynyna qaramastan, eldiń keıbir aımaqtaryna, ásirese taýly aımaqtarǵa jetý múmkin emes.

Verkehrsclub Österreich úkimettik emes uıymynyń málimetinshe, «klımattyq jol júrý bıleti» qoǵamda tanymal boldy.

«Saýalnama kórsetkendeı, adamdardyń ony satyp alýdyń basty sebebi – saıahattaǵan saıyn bılet týraly alańdamaıdy, ıaǵnı jaıly. Eger sizde abonement bolsa, qoǵamdyq kólikti kez kelgen jerde ońaı paıdalana alasyz. Meniń oıymsha, Eýropadaǵy barlyq kólik operatory osyǵan umtylýy kerek», - dep túsindirdi Verkehrsclub Österreich ókili Mıhael Shvendınger.