Qazaqstan Chernogorııanyń Podgorıtsa qalasynan Konsýldyǵyn ashýdy josparlap otyr
Memleket basshysy Chernogorııa Prezıdenti ıAkov Mılatovıchpen kelissóz júrgizdi, dep habarlaıdy QazAqparat Aqordanyń baspasóz qyzmetine silteme jasap.
Kezdesý barysynda Prezıdent Qazaqstan Chernogorııany Ońtústik-Shyǵys Eýropadaǵy mańyzdy seriktes retinde qarastyratynyn atap ótti.
Qasym-Jomart Toqaev kelesi jyly Podgorıtsa qalasynda Qazaqstannyń Konsýldyǵyn ashý jospary týraly aıtty. Bul qadam eki el arasyndaǵy iskerlik jáne tulǵaaralyq baılanystardy damytýǵa tyń serpin beredi.
– Bizdiń elderimizdiń arasy jaqyndaı tústi. Sebebi azamattarymyz Astanadan Podgorıtsaǵa tikeleı áýe reısimen ushady. Jyl saıyn 40 myńnan astam adam vızasyz rejımdi paıdalanady. Qazaqstan azamattary Chernogorııaǵa eńbek demalysyn ótkizý úshin ushyp barady. Árıne, bul elderimiz arasyndaǵy gýmanıtarlyq baılanys pen ekonomıkalyq yntymaqtastyqty damytýǵa tyń serpin beredi. Biz Podgorıtsada óz Konsýldyǵymyzdy ashýdy josparlap otyrmyz. Atalǵan salalardaǵy oń nátıjelerge, ásirese ekonomıkalyq yntymaqtastyqtaǵy jetistikterge qaraı sizdiń elińizde elshiligimizdi ashýymyz múmkin, – dedi Qasym-Jomart Toqaev.
ıAkov Mılatovıch ekijaqty yntymaqtastyqtyń qarqyndy damyp kele jatqanyn atap ótti
Chernogorııa Prezıdenti jan-jaqty baılanysty odan ári nyǵaıtýǵa nıet bildirdi.
– Prezıdent myrza, men Sizben kezdeskenime óte qýanyshtymyn. Ózińiz biletindeı, biz Qazaqstan men Chernogorııa arasyndaǵy dostyqty óte joǵary baǵalaımyz. Osy kezdesýge menimen birge elimizdiń Premer-mınıstri de keldi. Ol Chernogorııany qazaqstandyq týrıster úshin tartymdy etýge erekshe qyzyǵýshylyq tanytady. Eki el arasyndaǵy tikeleı áýe reısiniń qyzmet kórsete bastaǵanyna óte qýanyshtymyz. Bizge Qazaqstannan týrısterdiń kóptep keletini qýantady, – dedi ıAkov Mılatovıch.
Prezıdentter halyqaralyq kún tártibindegi máselelerdi jáne taraptardyń Birikken Ulttar Uıymy aıasyndaǵy ózara yqpaldastyǵynyń jaı-kúıin talqylady.
Kezdesý sońynda Qasym-Jomart Toqaev pen ıAkov Mılatovıch bir-birin óz elderine resmı saparmen kelýge shaqyrdy.
