Geosaıası jaǵdaılarǵa qaramastan bizdiń qoǵam men Úkimet Ádiletti Qazaqstan quryp jatyr – Prezıdent
Birikken Ulttar Uıymy Bas Assambleıasynyń 78-sessııasynda sóz sóılegen Prezıdent Qasym-Jomart Toqaev keıingi eki jylda Qazaqstanda júrgizilgen reformalardyń nátıjelerine toqtaldy, dep habarlaıdy QazAqparat tilshisi.
«Qazirgi álemdik, aımaqtyq geosaıası jaǵdaılarǵa qaramastan bizdiń qoǵam men Úkimet Ádiletti Qazaqstan quryp jatyr. Qysqa ýaqyt ishinde eldegi ınstıtýttardy reformalap, Kostıtýtsııaǵa ózgeris engizip, Prezıdenttiń ókilettigin qysqartyp, saıası jáne ekonomıkalyq júıeni qaıta qarap, jemqorlyqpen kúrestik. Nebári eki jyldyń ishinde kóp is atqaryldy. Osy aralyqta bizdiń turǵyndardyń mentalıteti aıtarlyqtaı ózgerdi. Ásirese, jastardyń sana seziminde ózgeris baıqalady. Prezıdent mandaty bir rettik ári 7 jyldyq merzimmen shekteldi. Bul usynysty jalpyhalyqtyq referendýmda Qazaqstan halqy qoldady. Biz kúshti Prezıdent - yqpaldy Parlament - esep beretin Úkimet qaǵıdasyn berik ustanamyz», - dedi Prezıdent sessııanyń jalpy debatynda sóılegen sózinde.
Memleket basshysy bul reformalar Qazaqstanda ádil, zań ústemdigi ornaǵan qoǵam qurýǵa baǵyttalǵanyn atap ótti.
«Qandaı jaǵdaıda da zań ústemdik etýi tıis. Investıtsııa tartý, adamı kapıtaldy damytý bizdiń ekonomıkamyzdy nyǵaıta túsetinin bilemiz. Munymen qatar Qazaqstanda genderlik teńdikti qamtamasyz etý baǵytynda ilgerileý bar. Biz partııalyq tizim boıynsha saılanatyndar qataryna jastar, áıelder jáne múmkindigi shekteýli jandar úshin 30 paıyzdyq kvota engizdik. Bul osy sanattaǵy azamattardyń eldiń saıası ómirine belsendi qatysýyna yqpal etedi», - dep túıindedi Prezıdent.
Memleket basshysy BUU Bas Assambleıasynyń sessııasynda sóz sóıleı otyryp, Qazaqstan jastaryna zor senim artatynyn aıtty. Tıisinshe olardyń jan-jaqty damýy úshin elde barlyq jaǵdaı jasalady.
