Qazgıdromet qyrkúıektiń 19-y kúngi aýa raıy boljamyn jarııalady

«Qazgıdromet» RMK-sy qyrkúıektiń 19-y kúngi aýa raıy boljamyn jarııalady, dep habarlaıdy QazAqparat.

Atmosferalyq frontaldy bólikterdiń ótýine baılanysty Qazaqstannyń basym bóliginde kún qubylmaly bolady, naızaǵaı oınap jańbyr jaýady. Respýblıka boıynsha soltústikte, soltústik-batysta, ońtústikte, ońtústik-shyǵysta, ońtústik-batysta - ekpindi jel, batysta, soltústikte, shyǵysta, ortalyqta tuman túsedi.

Qyzylorda oblysynyń ortalyǵynda, shyǵysynda, ońtústiginde, Ulytaý oblysynyń ońtústiginde, tótenshe órt qaýpi saqtalady, Qaraǵandy oblysynyń ońtústiginde órt qaýpi kútiledi.

Jambyl, Túrkistan oblystarynda joǵary órt qaýpi saqtalady.

Shyǵys Qazaqstan oblysynyń soltústiginde, shyǵysynda topyraq betinde 1 gradýs úsik kútiledi.