Almatyda BUU-nyń Ornyqty damý maqsattary jónindegi óńirlik ortalyǵyn ashatyn ýaqyt keldi – Toqaev
Almatyda Ortalyq Azııa jáne Aýǵanstan úshin BUU-nyń Ornyqty damý maqsattary jónindegi óńirlik ortalyǵyn ashatyn ýaqyt keldi. Bul týraly Birikken Ulttar Uıymy Bas Assambleıasynyń 78-sessııasynda sóılegen sózinde Prezıdent Qasym-Jomart Toqaev aıtty, dep habarlaıdy QazAqparat tilshisi.
«Bizdiń aımaqtyń kún tártibindegi eń ózekti másele – Aýǵanstan. Ol turaqty, órkendegen memleketke jáne senimdi saýda seriktesine aınalýy kerek. Osy oraıda Almatyda Ortalyq Azııa jáne Aýǵanstan úshin BUU-nyń Ornyqty damý maqsattary jónindegi óńirlik ortalyǵyn ashatyn ýaqyt keldi. BUU-ǵa múshe memleketterdiń barlyǵyn bizdiń osy bastamamyzdy qoldaýǵa shaqyramyn», - dedi Prezıdent.
Sondaı-aq Qasym-Jomart Toqaev Qazaqstan Ortalyq Azııa elderimen kópjaqty yntymaqtasty odan ári nyǵaıtýǵa nıetti ekenin atap ótti.
«Bizdiń aımaq halyqaralyq qaýymdastyqtyń «birtutas ári derbes» bóligi retinde mańyzdy ról atqarady. Sondaı-aq damýdyń jahandyq protsesterine óz úlesin qosa alady. Baqytymyzǵa oraı, ekonomıkalyq belsendilik artyp keledi. Sońǵy 5 jylda óńir ishindegi taýar aınalymy eki ese ósip, 10 mıllıard dollardy qurady», - dep nátıjelerge toqtaldy Memleket basshysy.
Buǵan qosa Prezıdent BUU zalyna jınalǵan memleket basshylary adamzattyń bolashaǵyna jaýapty ekenin basa aıtty.
Sonymen qatar, Qasym-Jomart Toqaev qazirgi geosaıası jaǵdaılarǵa qaramastan bizdiń qoǵam men Úkimet Ádiletti Qazaqstan quryp jatqanyn atap ótti.
