Zymyran bólshekteriniń qulaýynan zardap shekken qazaqstandyqtarǵa Reseı kómek kórsetedi

ASTANA. QazAqparat - QR Qorǵanys jáne aeroǵarysh ónerkásibi mınıstri Beıbit Atamqulov Jezqazǵan mańynda «Soıýz 2.1a» zymyran tasyǵyshy bólshekteriniń qulaýy saldarynan zardap shekkenderge kómekti reseılik tarap jasaıtyndyǵyn málim etti, dep habarlaıdy QazAqparat.

Zymyrannyń qosalqy bólshekteri arnaıy bólingen aýmaqqa túskenine toqtalǵan mınıstr, «órtti sóndirýge qatysty jumystar atqaryldy. Aspannan túsken temir qatty qyzady, sondyqtan jartylaı shóleıtti jazyqqa túskennen keıin aptap ystyq kúni órt boldy. Osy baǵyttaǵy sharalardyń barlyǵy reseılik tarapqa tıesili. Atap aıtqanda, bul jumystar jalǵa alýǵa qatysty shyǵyndarda tolyqtaı qarastyrylǵan»,-dedi.

Bul turǵyda zardap shekkenderdi kómekpen RF jaǵy qamtıtyndyǵyn atap ótti. 

«Olarǵa barsha kómekti Roskosmos qarastyrady. Naqty somany aıta almaımyn, qazirgi kezde onyń deńgeıi qarastyrylýda. Zardap shekken adam Roskosmosta qyzmet etkenimen, ol Qazaqstan azamaty. Atalǵan kásiporynda qyzmet etkendikten, olarǵa barlyq qajetti kómekti reseılik tarap kóteredi. Atalǵan jaǵdaı jazataıym oqıǵa retinde qaralyp otyr, qyzmetker kólikte otyrǵan, jeldiń nátıjesinde órt kólikti sharpyǵan»,-dedi vedomstvo basshysy.

Budan buryn habarlanǵandaı, «Roskosmos» Jezqazǵan mańynda bolǵan adam óliminiń sebebin túsindirgen edi. «Zymyrannyń qosalqy bólshekteriniń qulaý aýmaǵynda aýa raıynyń qolaısyzdyǵyna baılanysty (+34 gradýs, jeldiń uıytqýy 15m/sek) jazyq dalada ot tutandy. Turǵyndarǵa tóngen qaýip joq, órt saldary joıyldy. Órt sóndirý barysynda KamAZ avtokóligin basqarǵan  «Mashına jasaý ǴÓB» jumysshysy qaza tapty. Qatty jel turýy saldarynan KamAZ otqa orandy», - delingen Roskosmos habarlamasynda.

Sonymen qatar ekinshi qyzmetkerdiń denesin kúıik shalǵan bolatyn. Onyń em-domyna arnalǵan materıaldyq shyǵyndardy reseılik «Mashına jasaý» kásiporyny óz moınyna aldy.

Reseı ǵarysh aılaǵynda «Mashına jasaý UQ» AQ («Roskosmos» memlekettik korporatsııasyna kirmeıdi) qulaý aýdandaryn paıdalanýǵa berýdi qamtamasyz etýmen aınalysatyndyǵy anyqtaldy. Vedomstvonyń málimetinshe, 2017 jyldyń 14 maýsymynda «Soıýz 2-1a»  zymyran tasyǵyshy Halyqaralyq ǵarysh stansasy baǵdarlamasymen «Progress MS-06» júk kemesimen ushyrylýy sátti aıaqtalǵannan keıin, onyń bólingen bólshekteri Jezqazǵannyń batys aýmaǵynda, 50 shaqyrym qashyqtyqta ornalasqan  aldyn ala belgilengen jerge qulaǵan.