Zilzaladan qaza bolǵandar sany 46,1 myńnan asty – Túrkııa prezıdenti

ANKARA. ANADOLY – QazAqparat – Túrkııanyń ońtústik-shyǵysynda bolǵan zilzaladan qaza tapqandar sany 46 104 adamǵa jetti. Bul týraly atalǵan el prezıdenti Rejep Taııp Erdoǵan Mınıstrler kabınetiniń otyrysynan keıin joldaǵan teleúndeýinde aıtty, dep habarlaıdy QazAqparat Anadoly agenttigine silteme jasap.

«Jer silkinisinen keıingi tór aptadan soń bastan ótkergen alapattyń aýqymyn anaǵurlym naqty kórip otyrmyz jáne qaıǵymyzdy anaǵurlym tereń sezinýdemiz», - dedi Túrkııa prezıdenti. Onyń atap ótýinshe, el bıligi tabıǵı apat saldarynan qıraǵan aýdandardy qysqa ýaqytta qalpyna keltirýge bekinip otyr.

«Bizdiń maqsat – aldaǵy eki aıda 244 ǵımarttyń jáne aýyldyq úlgidegi 75 myń úıdiń qurylysyn bastaý», - dedi Erdoǵan. Onyń sózinshe, 22 myń úıdiń qurylysy bastalyp ketti. Zilzaladan zardap shekken aýdandarda 488 myń jańa úı salý josparlanýda. Sondaı-aq atalǵan aýdandarda konteınerlik úlgidegi 100 myń úı ornatylatyn bolady.

Eske salaıyq, 6 aqpan kúni Túrkııada qýaty 7 baldan asatyn joıqyn jer silkinisi boldy. Sońy myńdaǵan aftershokqa ulasqan jerasty dúmpýleri túrik eliniń 10 provıntsııasynda, sondaı-aq kórshi memleketterde, sonyń ishinde Sırııada sezildi.