«Jyndy» jazýshylar» - baspasózge sholý
Elimizdiń bas gazeti « Egemen Qazaqstan » basylymy óziniń juma kúngi sanynda keshegi Astanada ótken Joǵary Eýrazııalyq ekonomıkalyq keńestiń Memleketter basshylary deńgeıindegi otyrysyna qatysty jáne ondaǵy kóterilgen máseleler men Eýrazııalyq ekonomıkalyq odaq týraly sharttyń basty qaǵıdattary jaıynda maqala jarııalady.
«Otyrys Qazaqstan Respýblıkasynyń Prezıdenti Nursultan Nazarbaevtyń, Reseı Federatsııasynyń Prezıdenti Vladımır Pýtınniń, Belarýs Respýblıkasynyń Prezıdenti Aleksandr Lýkashenkonyń qatysýymen shaǵyn quramdaǵy kezdesýden bastaldy. Memleket basshylary Keden odaǵy men Birtutas ekonomıkalyq keńistikti damytýdyń negizgi baǵyttaryn, sondaı-aq, eýrazııalyq ıntegratsııalyq úderisterdi keńeıtý máselelerin talqylady», - dep jazylǵan « Eýrazııalyq ekonomıkalyq odaq - ýaqyt talabyna laıyqty jaýap » atty materıalda.
« Aıqyn » basylymy « Jyndy » jazýshylar » atty taqyryppen jarııalanǵan maqalada álemge uly ıdeıalar tartý etken, biraq esinen aljasyp, jazylmas júıke syrqatyna ushyraǵan jazýshylar, sýretshiler, ǵalymdardyń birazyn aldyǵa tartyp kórgen.
«Ataqty sýretshi Van Gog (1853-1890) esersoqtyqpen óziniń sol qulaǵyn ótkir ustaramen kesip tastap, sol qansyraǵan kúıinde avtoportretin salǵan, ol azdaı 37 jasynda ózin-ózi óltirgen. Artynan uly sýretshige tiri kezinde qoıylǵan 150-den astam dárigerlik dıagnozdar tabylǵan. Syrqatynyń sumdyǵyn osydan bile berińiz.
Amadeı Motsart (1756-1791) ózin áldekimder ýlap óltirgeli júrgendeı sekemdenip, únemi úreı ústinde júrgen. Jaryqtyqtyń ishki túısigi aldamapty.
Jumyrtqa eken dep qolsaǵatyn qýyryp jibergen Isaak Nıýtonda (1643-1727) da jyndylyq jetip artylady.
Uly kompozıtor Robert Shýman (1810-1856) ózin sóıleıtin ústel izinen qalmaı qýyp júrgendeı kóripti, al túrli jańa áýenderdi ózine Bethoven molasynan joldap jatqandaı sezingen. Aqyrynda qorqynyshtan ózin-ózi óltirgen», - delinedi maqalanyń bir bóliginde.
HHI ǵasyrdaǵy teketires endi álem tilderi arasynda ótpek, dep jazady « Aıqyn » basylymy « Til úshin teketires » atty taǵy bir dúnıesinde.
«Tarıhqa júginsek, álemge tiliniń yqpalyn arttyrý arqyly ústemdik júrgizý burynnan bar jáne ózin-ózi ábden aqtaǵan tásil. Sebebi ıdeologtar «Jahandaný ózara elderdi yntymaq-birlikpen mádenı-ekonomıkalyq kommýnıkatsııa qurady. Soǵys pen birin-biri joıý úshin ketken ólsheýsiz shyǵyndar álemdi saqtap qalýdyń tásili - jańa energetıkalyq kózderdi tabýǵa baǵyttalmaq. Álemdi kommýnıkatsııaǵa keltiretin, yntymaqtastyqqa yntalandyratyn, baǵyttaıtyn qural - lıngvıstıkalyq kanal, ıaǵnı til», - delingen maqalada.
«Byltyr qazynadan bólingen 130 mıllıard teńge ıgerilmeı qalǵan. Bul úrdis orynsyz dástúrge aınalǵandaı. Jyl saıyn qazynadan qısapsyz qarjy bólinedi, al qorytyndysy suraýsyz. Jaýapkershilikti bir-birine silteıtin sheneýnikter eki ortada kóptegen jastardy baspanasyz, jurtty aýyzsýsyz qaldyryp keledi...» dep jazady « Túrkistan » gazeti « Esh ketken esepsiz qarjy » atty maqalada.
«Esep komıtetiniń tóraǵasy Qozy-Kórpesh Jańbyrshın men Qarjy mınıstri Baqyt Sultanov depýtattar aldynda esep berdi. Komıtet tóraǵasynyń aıtýynsha, 2013 jyly 13 memlekettik baǵdarlamany iske asyrý barysy álsiregen. Sáıkesinshe bólingen qarajat da qaraýsyz jumsalyp, tipti tolyǵymen ıgerilmegen. Atap aıtsaq, «Qol jetimdi baspana» pen «Turǵyn úı sharýashylyǵyn jańǵyrtý» baǵdarlamalary kún tártibindegi máseleler. Qanshama qandasymyz baspana ala almaı, kezegin kútip sarylýda. Al páter jaldaǵan kópshiliktiń kezekke turýǵa múmkindigi de joq. Túıtkildi máseleniń mańyzdylyǵyn bile tura, qarajattyń qalaı jáne qaıda ketkenin qadaǵalamaý boıkúıezdik pe, álde jaýapsyzdyq pe?» - delinedi materıalda.
Almatynyń ortalyq meshit ımamdary mektep túlekterine UBT aldynda duǵa tileýdi usynypty, dep habarlaıdy resmı tilde shyǵatyn «Ekspress K» gazeti.
«Shyn nıet pen arnaıy súreler barlyq saýaldarǵa jaýap berýge kómektesedi, dep senedi moldalar. «UBT qarsańynda jastar kúni-túni testileýge daıyndalyp, synaqtan sátti ótetindigine úmit bildirgen tusta, jetistikke jetkizer taǵy bir máselege den qoıǵan durys: ol Allaǵa jalbarynyp, odan kómek suraý», - dep jazady din qyzmetkerleri meshittiń resmı saıtynda jáne «Ál-Fatıha» súresin úsh qaıtara oqýǵa keńes berdi», - delingen «Molılsıa lı ty na noch, pervokýrsnık?» maqalacynda.
