Jyl sońyna deıin soltústik óńirlerge 4,5 myń adam qonystanady

ASTANA. QazAqparat – Búgin Premer-Mınıstrdiń orynbasary Eńbek jáne halyqty áleýmettik qorǵaý mınıstri Tamara Dúısenova soltústik óńirlerge qonys aýdaratyndardy qoldaý sharalary týraly aıtty, dep habarlaıdy QazAqparat tilshisi.

«Jumys kúshi kóp óńirler men jumys kúshi jetispeıtin aımaqtar arasyndaǵy demografııalyq aıyrmany teńestirý úshin ishki utqyrlyqty yntalandyrý jumystary bastaldy. Bıyl «Serpin», «Aýyl Amanaty», «Aýyl - el besigi», «Dıplommen aýylǵa» sııaqty baǵdarlamalar arqyly 33 myńnan astam adamǵa memlekettik qoldaý kórsetiledi. Bul sanattaǵy azamattardy qoldaý úshin ekonomıkalyq utqyrlyq sertıfıkaty engizildi. Kóship kelýshiniń jumys berýshi rastaıtyn jumys orny bolǵan jaǵdaıda, bul azamatqa turǵyn-úı qunynyń 50 paıyzy mólsherinde, biraq 4 mıllıon teńgeden aspaıtyn sertıfıkat beriledi», - dedi T. Dúısenova Úkimet otyrysynda Kóshi-qon saıasaty tujyrymdasyn iske asyrý barysyn talqylaý kezinde

Osy oraıda mınıstr osyndaı sertıfıkatty 224 otbasy alǵanyn aıtty.

«Ekonomıkalyq utqyrlyq sertıfıkattaryn berýdiń oń nátıjesi qazirdiń ózinde baıqalyp otyr. Jyl sońyna deıin soltústik óńirlerge taǵy 4 512 adamdy (qonys aýdarýshylar men qandastar) qonystandyrýdy josparlap otyrmyz», - dedi vedomstvo basshysy.

Budan buryn habarlanǵandaı, Qazaqstanǵa negizinen qaı eldiń azamattary qonys aýdaryp jatqany anyqtaldy.