Jyl saıyn temekiden segiz mıllıon adam qaıtys bolady - DDU
Ol memleketterdiń bıligin mıllıondaǵan adamǵa azyq bolatyn paıdaly daqyldardy ósirýge shaqyrdy.
Keshe, juma kúni DDSU «Tabak emes, tamaq ósirińizder» degen taqyryppen baıandama jarııalady. Onda temeki óndirisiniń jaı-japsary áshkerelenedi. Onda jalǵan toptar arqyly temeki óndiretin fermerlerdiń múddesin kóterip, fermerlerdi «boryshtyq quldyqta» ustap, temeki óndirisin nasıhattap, onyń ekonomıkalyq paıdasyn ásireleý týraly aıtylǵan.
DDSU sarapshylarynyń pikirinshe, temekiniń zııany tutynýshylarǵa ǵana áser etpeıdi. Ony óndirý protsesi kezinde fermerler sozylmaly ókpe aýrýyna shaldyǵyp, nıkotınmen (jasyl tabak aýrýy dep te atalady) ýlanady. Oǵan qosa temeki óndirisinde álem boıynsha mıllıonnan astam bala jumys isteıdi.
«Temekiniń ornyna azyq-túlik ónimderin ósirý arqyly biz densaýlyqty birinshi orynǵa qoıyp, ekojúıeni saqtaımyz, óndiristik qaýipsizdikti nyǵaıtamyz», - dedi dáriger Tedros.
Ol álemde 300 mıllıonnan astam adam azyq-túlik ónimderiniń jetispeýshiliginen zardap shegetinin eske saldy. Soǵan qaramastan 120-dan astam elde 3 mıllıon gektardan astam jer temeki óndirý úshin paıdalanylady, onyń ishinde adamdar ash júrgen elder de bar.
Búgingi kúnge deıin temeki óndirisi Azııa men Ońtústik Amerıkanyń máselesi dep eseptelip keldi. Álemdegi temeki óndirisiniń 55 protsenti Brazılııa, Qytaı men Úndistanǵa tıesili.
Eýropa aımaǵynda tabak ónimderin óndirý boıynsha kóshbasshylar - Gretsııa, Italııa, Ispanııa, Polsha, Serbııa jáne Túrkııa.
Jyl saıyn 31 mamyrda DDSU men onyń seriktesteri Dúnıejúzilik Temekige qarsy kúres kúnin atap ótedi. Onyń maqsaty – temeki ónimderin paıdalanǵannan keıin paıda bolatyn máselelerge nazar aýdartyp, onymen tıimdi kúres sharalaryn uıymdastyrý.
Jyl saıyn DDSU temekini baqylaý salasynda jetistikke jetken adamdarǵa marapat tabystaıdy. Bıyl bul marapatty kenııalyq kásipker Sprına Robı Chacha aldy. Ol temeki óndirýdi toqtatyp, burshaq ósirýge kóshken jáne basqa da júzdegen fermerge osyndaı tásildi úıretti.
