Jyl saıyn sýdy kóp qajet etetin daqyldar egistikteri azaıtylady - AShM
«Ázirlenip jatqan Agroónerkásiptik keshendi damytý jónindegi 2021-2025 jyldarǵa arnalǵan ulttyq joba aıasynda sý únemdeý tehnologııalary qoldanylatyn alańdardy 450 myń gektarǵa deıin jetkizý ındıkatory kózdelgen. Sýy az tsıkldiń saqtalyp otyrǵanyn jáne sýaratyn sý tapshylyǵynyń ósýin eskere otyryp, fermerlerge sý únemdeý tehnologııalaryn belsendi túrde engizýdi usynamyz. Osyǵan baılanysty biz Ekologııa mınıstrliginiń barlyq oblystardyń alańdaryn aıqyndaı otyryp, Sý únemdeý tehnologııalaryn engizý jónindegi jol kartalaryn ázirlep, bekitý, josparlardyń oryndalýyn mindetti túrde baqylaý týraly usynysyn qoldaımyz», - dedi E. Qarashókeev.
Onyń aıtýynsha, fermerlerdi sý únemdeý tehnologııalaryn engizýge yntalandyrý maqsatynda qazirgi ýaqytta sý berý boıynsha kórsetiletin qyzmetterdi óteý jónindegi sýbsıdııalardy sýarý tásilderine baılanysty saralaý jumysy júrgizilip otyr, ıaǵnı sý únemdeý tehnologııalaryn qoldanatyn fermerler ǵana burynǵy deńgeıdegi sýbsıdııalardy alady.
«Sý únemdeýdiń mańyzdy baǵyttarynyń biri - sýdy kóp qajet etetin daqyldardy ártaraptandyrý. Jalpy alǵanda, mınıstrlik oblystar ákimdikterimen birlesip, jyl saıyn sýdy kóp qajet etetin daqyldar men monodaqyldardy azaıtý boıynsha tıisti jumystar júrgizip keledi. Máselen, aǵymdaǵy jyly 2020 jylmen salystyrǵanda maqta alańy 18 myń gektarǵa, kúrish alańy 7,6 myń gektarǵa azaıtyldy», - dedi mınıstr.
Úkimet otyrysynyń 2020 jylǵy 22 jeltoqsandaǵy hattamalyq tapsyrmasyn oryndaý maqsatynda aldaǵy ýaqytta Túrkistan oblysy boıynsha maqta alqaptaryn 100 myń gektarǵa deıin, sondaı-aq Qyzylorda oblysy boıynsha kúrishti 75 myń gektarǵa deıin azaıtý josparlanyp otyr.
Budan buryn habarlanǵandaı, osy jylǵy 1 qańtardaǵy jaǵdaı boıynsha sý únemdeý tehnologııalarymen qamtylǵan alań respýblıka boıynsha 248 myń gektardy qurady.
