Jyl saıyn elimizdiń aýyl sharýashylyǵynda 80 ınvest-joba iske qosylmaq

NUR-SULTAN. QazAqparat - Aldaǵy 5 jylda agrarlyq-ónerkásiptik keshenniń 380 jańa ınvestıtsııalyq jobasyn iske asyrý josparlanýda. Bul týraly Ortalyq kommýnıkatsııalar qyzmetinde ótken brıfıngte aıtyldy, dep habarlaıdy QazAqparat tilshisi.

«Onyń 65%-dan astamy - aýyl sharýashylyǵy ónimderiniń ımportyn almastyrýǵa baǵyttalǵan jobalar. Qalǵany AÓK eksporttyq áleýetin arttyrý mindetine jaýap beredi. Olar - jańa bordaqylaý alańdary, reprodýktorlar, jylyjaılar jáne basqalar», - deıdi QR AShM strategııalyq josparlaý jáne taldaý departamentiniń dırektory Sáýle Moldabaeva.

Onyń aıtýynsha, jyl saıyn orta eseppen 80-ge jýyq jobany iske qosý josparlanǵan.

«AÓK-degi jańa ınvestıtsııalyq jobalar da Memleket basshysynyń dándi jáne maıly daqyldardy, jemis pen kókónisterdi, qantty, et pen sútti óndirý jáne qaıta óńdeý jónindegi 7 iri ekojúıeni qurý jónindegi tapsyrmasyn oryndaýdyń ajyramas bóligi bolady. Mysaly, ósimdik sharýashylyǵynda «BioOperations» JShS zákirli kásipornymen Soltústik Qazaqstan oblysynda astyq óndirý jáne qaıta óńdeý boıynsha ekojúıe qurylady. Kooperatsııa qaǵıdaty boıynsha ekojúıe astyqty tereń óńdeý zaýytyn, qurama jem zaýytyn, qus sharýashylyǵy keshenin, taýarly sút fermasyn jáne osy kásiporyndardy aýyl sharýashylyǵy shıkizatymen qamtamasyz etetin óndirýshilerdi biriktiredi», - deıdi ol.