Jyl basynan beri Zeınetaqy qorynyń 13 bólimshesi jabyldy

ALMATY. QazAqparat - «Biryńǵaı jınaqtaýshy zeınetaqy qory» AQ óz qurylymyn tıimdi etý jumystaryn jalǵastyryp jatyr, dep habarlaıdy «QazAqparat» HAA tilshisi.

2018 jyldyń basynan beri shaǵyn eldi mekenderde 8, iri qalalarda 5 - jalpy 13 bólimshe jabylǵan. «BJZQ» AQ basqarma tóraǵasynyń orynbasary Sáýle Egeýbaeva baspasóz máslıhatynda Qor qyzmet kórsetý ortalyqtarynyń tıimdiligin únemi baqylap otyratynyn aıtty.

«Turǵyndarǵa zeınetaqy qyzmetteri báribir kórsetiledi. Adamdar tym az keletin bólimsheler jabylyp jatyr. Jabylǵan bólimshelerge jaqyn jerdegi qala jáne aýdandyq ortalyqtardaǵy BJZQ bólimderi jumys isteı beredi. Budan tys, Qor kásiporyndar men uıymdarǵa, shalǵaıdaǵy eldi mekenderge baryp qyzmet kórsetý tártibin júrgizedi. Osy arqyly Qor bıýdjeti 2017 jyly 20%-ke únemdeldi», - deıdi Sáýle Egeýbaeva.

BJZQ kóptegen qyzmetterin onlaın rejimde kórsetedi. Budan tys, «Qazposhta» AQ bólimsheleri arqyly transferagenttik qyzmetter kórsetý máselesi de qarastyrylyp jatyr.

«Árıne, Qordyń óz mamandarynan kásibı keńes alýǵa eshteńe jetpeıdi. Ázirlengen strategııa boıynsha, BJZQ árbir salymshy úshin zeınetaqyny jeke josparlaý jónindegi kásibı keńesshisi bolýǵa daıyn», - deıdi ol.

Statıstıkaǵa súıensek, 2017 jyly BJZQ qyzmetkerleri 6,4 mln operatsııa júrgizgen. Olar bir kúnde 22 myń operatsııa oryndaıdy. Qyzmet kórsetý bóliminiń bir qyzmetkeriniń kúndik ortasha júktemesi 33 operatsııany, qyzmet kórsetý ortalyqtarynda bul kórsetkish 21 operatsııany quraıdy.