Jyl basynan beri Qazaqstan joldarynda 2600 kólik apaty bolǵan

NUR-SULTAN. QazAqparat – Qazaqstanda jyl basynan beri 2600 jol-kólik oqıǵasy bolyp, 410 adam kóz jumǵan. Bul týraly ІІM Ákimshilik polıtsııa komıtetiniń tóraǵasy Atyǵaı Arystanov aıtty, dep habarlaıdy QazAqparat tilshisi.

«Keıingi 5 jylda jyl saıyn 2 myńnan astam adam jol-kólik oqıǵasynan kóz jumady, 20 myńnan astam adam jaraqat alady. Jyl basynan beri 2600 jol-kólik oqıǵasy boldy. Sonyń ishinde, ókinishke qaraı, 3500 adam túrli jaraqat aldy. Ol da ońaı emes «, - dedi spıker .

Onyń málimetinshe, bıyldyqqa jyldamdyqty shekten tys asyrýdan 758 jol-kólik oqıǵasy oryn alǵan.

«Úsh aı ishinde 465 jol-kólik oqıǵasy balalardyń qatysýymen bolǵan», - dedi Arystanov.

Sondaı-aq, komıtet tóraǵasy esepti kezeńde 1,2 mıllıonnan astam jol qozǵalysy erejelerin buzýshylyqtyń joly kesilip, 74 myńǵa jýyq júrgizýshi jaýapkershilikke tartylǵanyn jetkizdi. Al jolaýshylar men júkterdi tasymaldaý, qaýipsizdik beldigin paıdalaný erejelerin saqtamaǵany úshin 56 myń júrgizýshige aıyppul salynǵan.

«Kólikti mas kúıinde basqarǵany úshin 5,7 myńǵa jýyq júrgizýshi ustaldy. Jyl basynan beri 290 adam júrgizýshi kýáliginen ómir boıyna aıyryldy», - dedi Atyǵaı Arystanov.

Buǵan deıin Іshki ister mınıstrligi Jyl basynan beri 450 bala jol-kólik apatynan zardap shekkenin málim etken bolatyn.