Jyl basynan beri Qazaqstan óndiristerinde 564 adam zardap shekti

NUR-SULTAN. QazAqparat – Jyl basynan beri elimizdegi óndiriste jazataıym oqıǵa saldarynan 564 adam zardap shekti. Bul týraly QR Úkimetiniń otyrysynda Eńbek jáne halyqty áleýmettik qorǵaý mınıstri Serik Shápkenov aıtyp berdi, dep habarlaıdy QazAqparat tilshisi.

«Memleket tarapynan qaýipsiz eńbek jaǵdaılaryn jaqsartý máselelerine aıryqsha kóńil bólinedi, bul jumyskerlerdiń quqyqtaryn qorǵaýdyń mańyzdy talaby bolyp tabylady. Qazaqstanda jyl saıyn 400-den astam kásiptik aýrýlar tirkeledi. Qabyldanǵan keshendi sharalardyń nátıjesinde sońǵy 5 jylda óndiristik jaraqat alǵandardyń sany 10%-ǵa azaıyp otyr. Onyń ishinde qaza tapqandardyń sany 16%-ǵa tómendedi. Al myń adamǵa shaqqandaǵy jazataıym oqıǵalardyń jıilik koeffıtsıenti 0,32-den 0,23-ke deıin tústi», - dedi Serik Shápkenov Úkimet otyrysynda.

Bıylǵy bes aıdyń qorytyndysy boıynsha jazataıym oqıǵanyń saldarynan 564 adam zardap shekti. Olardyń 19,5%-y taý-ken, metallýrgııa kásiporyndarynda, 10%-y qurylys salasynda jáne 4,5%-y kommýnaldyq sharýashylyǵynda jaraqat aldy.

«Resmı statıstıkaǵa sáıkes 2020 jyly kásiporyndarda zerttelgen 1,6 mıllıon jumyskerdiń 367 myńy nemese 22% zııandy eńbek ornynda jumys istegen. Olardyń basym kópshiligi ónerkásiptik óńirlerde, ıaǵnı Qaraǵandy, Pavlodar, Shyǵys Qazaqstan, Mańǵystaý oblystarynda qyzmet etken. Árbir ekinshi adam shý men dirildiń, al árbir úshinshisi jumys aımaǵynda gazdyń lastanýy men shańdanýdyń joǵary jaǵdaıynda eńbek etedi. Ekonomıka salalary boıynsha zııandy eńbek jaǵdaıynda jumyspen qamtylǵandardyń eń kóp sany taý-ken jáne óńdeý ónerkásipterine tıesili», - deıdi Eńbek mınıstri.