Jyl basynan beri kásiporyndarda 134 adam qaza tapty

ASTANA. QazAqparat – Jyl basynan beri elimizdiń kásiporyndarynda 999 adam zardap shekti jáne 134 adam qaza tapty, dep habarlaıdy QazAqparat tilshisi.

Bul týraly QR Eńbek jáne halyqty áleýmettik qorǵaý mınıstrligi, Eńbek, áleýmettik qorǵaý komıtetiniń tóraǵasy Tólegen Ospanqulov aıtyp berdi.

«Jyl basynan beri 9 aıda elimizdiń kásiporyndarynda 999 adam zardap shekti, bul ótken jyldyń tıisti kezeńinen 5,8%-ǵa tómen. 134 adam qaza tapty, bul da ótken jylmen salystyrǵanda 4,3%-ǵa tómen», - dedi Tólegen Ospanqulov Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, jazataıym oqıǵalardyń negizgi sebepteri – zardap shekkenderdiń salǵyrttyǵy (34,9%), óndiris pen jumystardy jetkilikti túrde uıymdastyrmaý, eńbek qaýipsizdigi jáne eńbekti qorǵaý erejelerin buzý, jol qozǵalysy erejelerin buzý.

«Eń kóp jaraqat alý jaǵdaılary burynǵydaı elimizdiń ónerkásiptik óńirlerinde – Qaraǵandy, Shyǵys Qazaqstan oblysy, Qostanaı, Aqtóbe, Pavlodar oblysy jáne Almaty qalasynda saqtalýda. Zardap shekkenderdiń eń kóp sany taý-ken metallýrgııa kesheni men qurylys salasynyń kásiporyndarynda baıqalady», - dedi T. Ospanqulov.