Jyl basynan beri ınternet alaıaqtarǵa aldanǵandardyń 1 mlrd teńge materıaldyq shyǵyny óteldi

NUR-SULTAN. QazAqparat – Jyl basynan beri qazaqstandyqtar 11 myńnan astam ınternet alaıaqtyq áreketke tap bolǵan. Bul týraly Іshki ister mınıstrligi Tergeý departamentiniń bastyǵy Sanjar Ádilov málim etti, dep habarlaıdy QazAqparat tilshisi.

«Jyl basynan beri 11 myńnan astam ınternet-alaıaqtyq jasaldy. Internet-alaıaqtyqtyń aldyn alý úshin mınıstrlik halyq arasynda onyń túrli tásilderi týraly aqparattyq-túsindirý jumysyn keńinen júrgizýde. Bıyldan bastap ishki ister organdarynyń bólimsheleri buqaralyq aqparat quraldarynda alaıaqtyq jasaý tásilderi men shemalary, qaýipsizdik sharalaryn saqtaý týraly myńnan astam jarııalanym, onyń ishinde jarııa etý mysaldaryn keltire otyryp, júrgizilip jatqan jumys týraly beınerolıkter men baspasóz relızderin ornalastyrdy», - dedi ІІM ókili vedomsvtonyń aqparat alańynda ótken onlaın brıfıngide.

Onyń aıtýynsha, Іshki ister mınıstrligi Qarjy monıtorıngi agenttigimen birlesip, nesıe berý, bank qyzmeti jáne mobıldi jolmen aqsha aýdarý salasyndaǵy alaıaqtyqtyń aldyn alýǵa baǵyttalǵan keshende sharalar qabyldap jatyr.

Sondaı-aq, departament bastyǵy 7 aıda osy sanattaǵy qylmystyq ister boıynsha sotqa deıingi tergeý barysynda jábirlenýshilerge mıllıard teńgeden astam materıaldyq zalal ótelgenin habarlady.

Sondaı-aq, Sanjar Ádilov ınternet-alaıaqtyqtyń eń kóp taralǵan tásilderge toqtaldy. Ásirese ınternetke habarlandyrý qoıyp, sonyń negizinde taýardyń men qyzmet aqysyn ishinara nemese tolyq kólemde aldyn ala suraý jıi kezdesedi. Habarlandyrýdaǵy baǵa naryqtaǵy baǵadan arzan ekenine qyzyqqan tutynýshylar mundaı aılaǵa ońaı aldanatyn kórinedi. Saldarynan ınternet arqyly tapsyrys berilgen taýardy jetkizbeý, tapsyrys berilgen qyzmetterdi oryndamaý boıynsha polıtsııaǵa jıi shaǵym túsýde.