Jyl basynan beri azyq-túlik baǵasy 3,5%-ǵa ósken

ASTANA. QazAqparat – Jyl bastalǵaly elimizde azyq-túlik baǵasy belgili kólemde ósken. Al, keıbir ónimderdiń arzandaǵany baıqalady. Bul týraly ortalyq kommýnıkatsııalar qyzmeti alańynda ótken baspasóz máslıhatynda aıtyldy, dep habarlaıdy QazAqparat tilshisi.

«Bıylǵy maýsymaralyq kezeńde 139,5 myń tonna ónim qory jasaqtaldy. Búginde onyń 62,1 myń tonnasy tutynýǵa jiberildi. Atap aıtqanda, kartop – 29,7 myń tonna, sábiz – 11,7 myń tonna, pııaz – 11,9 myń tonna jáne 8,7 myń tonna qyryqqabat. Nátıjesinde Úkimet negizgi azyq-túlik baǵasynyń ósý qarqynyn toqtata aldy. Sońǵy 7 aptada baǵa 0,1%-dan aspady, al jyl basynan beri azyq-túlik baǵasy 3,5%-ǵa kóterildi. Sońǵy 5 jyl ishinde ortasha eseppen 6,4% boldy», - dedi Saýda jáne ıntegratsııa birinshi vıtse-mınıstri Arman Shaqqalıev.

Onyń aıtýynsha, 2024 jyly maýsymaralyq kezeńde baǵa aýytqýy bolmaýy úshin taýar óndirýshilermen qazirden kelisimshart jasalyp jatyr.

«Atalǵan maqsatqa jetý úshin búginde 90 myń tonnaǵa jýyq kókónis ónimi jasaqtaldy. Sondaı-aq, bıyl tarıftik jáne tarıftik emes retteýde ýaqtyly qabyldanǵan sharalar oń nátıjesin berdi. Otandyq taýar óndirýshilerdi shıkizatpen qamtamasyz etý úshin bıyl 4 aqpannan bastap kúnbaǵys tuqymyna eksporttyq kedendik bajdar engizildi. Bul shara kúnbaǵys maıyn óndirýde ishki naryqty shıkizatpen qamtýǵa múmkindik berdi», - deıdi ol.

Buǵan deıin birinshi saýda vıtse-mınıstri arzan azyq-túlikti qaıdan alýǵa bolatynyna qatysty pikir bildirgen edi.