Jyl basynan beri 51 mlrd teńge múgedektik boıynsha járdemaqy tólendi

NUR-SULTAN. QazAqparat - 2021 jylǵy qańtar-aqpan aılary aralyǵynda respýblıkalyq bıýdjetten múgedektigi boıynsha memlekettik áleýmettik járdemaqy tóleýge 51 mlrd teńge, asyraýshysynan aırylý jaǵdaıyna 13,5 mlrd teńge jumsaldy, dep habarlaıdy QazAqparat.

«2021 jylǵy aqpanda respýblıkalyq bıýdjetten múgedektigi boıynsha memlekettik áleýmettik járdemaqylardy tóleýge 25,6 mlrd teńge, asyraýshydan aıyrylý jaǵdaıy boıynsha 6,8 mlrd teńge baǵyttaldy.

2021 jylǵy 1 naýryzdaǵy jaǵdaı boıynsha múgedektigi boıynsha memlekettik áleýmettik járdemaqy alýshylardyń sany 520,8 myń adamdy, asyraýshysynan aıyrylý jaǵdaıy boıynsha 167,2 myń adamdy qurady», - delingen Eńbek mınıstrligi málimetinde.

Múgedektik jáne asyraýshydan aıyrylý jaǵdaıy boıynsha memlekettik áleýmettik járdemaqylardyń mólsheri múgedektiktiń toby men sebebine, qaıtys bolǵan (qaza tapqan) asyraýshynyń asyraýynda bolǵan adamdardyń sanyna, sondaı-aq tıisti qarjy jylyna arnalǵan «Respýblıkalyq bıýdjet týraly» zańda belgilengen eń tómengi kúnkóris deńgeıine baılanysty bolady.

2021 jylǵy 1 naýryzdaǵy jaǵdaı boıynsha múgedektigi boıynsha memlekettik áleýmettik járdemaqynyń ortasha mólsheri 49 211 teńgeni, asyraýshydan aıyrylý jaǵdaıy boıynsha memlekettik áleýmettik járdemaqynyń ortasha mólsheri 40 976 teńgeni qurady.