Jyl basynan beri 47 qazaqstandyq shetelde tegin emdelgen
Taǵy bes patsıent emdelýge joldama kútýde, sebebi aýrýhanaǵa jatqyzý kúni keshirek belgilengen.
2020 jyldyń 1 qazanyndaǵy jaǵdaı boıynsha Áleýmettik medıtsınalyq saqtandyrý qory sheteldik klınıkalarmen 787 mln teńge somaǵa shart jasasty.
Qarajat týys emes donordan súıek kemigin transplanttaýdy júrgizýge, aǵzalardy transplanttaýǵa, stereotaksıkalyq radıoterapııaǵa/radıohırýrgııalyq emdeýge, protondyq terapııaǵa baǵyttalǵan. Osylaısha, shetelde emdeletin negizgi aýrýlar transplantatsııa, onkogematologııa jáne jeke organdardyń onkologııasy profılderine jatady.
«Qazaqstandyqtar 2012 jyldan bastap bıýdjet esebinen shetelge emdelýge barady. Bul baǵdarlama bizdiń elimizde áli damymaǵan nemese ótkizilmegen joǵary tehnologııalyq qyzmet túrlerin alý múmkindigin qamtamasyz etý úshin qurylǵan», - dep atap ótti Áleýmettik medıtsınalyq saqtandyrý qory.
Azamattardy shetelge emdelýge jiberý tegin medıtsınalyq kómektiń kepildik berilgen kólemi sheńberinde júzege asyrylady. Memleket sondaı-aq patsıenttiń jáne onyń alyp júrýshileriniń kólik shyǵyndaryn óteıdi.
Baǵdarlama patsıentter jeke qarajaty úshin sheteldik medıtsınalyq klınıkalarǵa emdelýge baratyn jaǵdaılarǵa qoldanylmaıdy.
Shetelde emdeýdiń oryndylyǵy týraly máseleni qaraý úshin patsıent respýblıkalyq densaýlyq saqtaý uıymyna (ǴZI, medıtsınalyq ortalyq) júginýi qajet, ol patsıentti shetelge emdelýge jiberý týraly qorytyndy shyǵarady, qujattar paketin ÁMSQ bazasynda jumys isteıtin shetelde emdeýdi uıymdastyrý jónindegi komıssııanyń jumys organynyń qaraýyna usynady. Jumys organy týraly aqparatty myna siltemeden tabýǵa bolady.
Sońǵy sheshimdi alqaly organ bolyp tabylatyn densaýlyq saqtaý mınıstrliginiń Saraptama komıssııasy qabyldaıdy. Shetelde em qabyldaýǵa úmitker patsıentter qujattaryn qarastyrý kezeńderin óz ótinim kodtary arqyly komıssııa jumys organynyń bóliminde qadaǵalaı alady.
Patsıentterge ótinim kody olardyń qujattary jumys organyna túsken ýaqytta jumys organy qyzmetkerlerimen beriledi.
Qazaqstan Reseı, Belarýs, Túrkııa, Ońtústik Koreıa, Úndistan, Germanııa, Ispanııa jáne t. b. aldyńǵy qatarly beıindi klınıkalarmen yntymaqtastyq ornatqan. Sheteldik medıtsınalyq uıymdy tańdaýdaǵy negizgi krıterııler – qajetti emdeý baǵdarlamasynyń bolýy, emdeýdiń ınnovatsııalyq ádisterin paıdalaný, baǵa saıasaty.
Budan basqa, bul baǵdarlama respýblıkalyq medıtsınalyq uıymdar bazasynda Qazaqstanda joǵary tehnologııalyq medıtsınalyq qyzmetterdiń damýyn yntalandyrady. Tartylǵan sheteldik mamandar jergilikti dárigerlerge sheberlik sabaqtaryn ótkizedi.
Jyl saıyn bıýdjet qarajaty esebinen shetelge emdelýge 100-den astam patsıent jiberiledi, sheteldik mamandardy tarta otyryp, master-klastar sheńberinde otandyq medıtsınalyq uıymdarda emdelýge 30-dan astam patsıent jiberiledi.
