Jyl basynan beri 3 670 onlaın kazıno buǵattaldy

ASTANA. QazAqparat - Týrızm ındýstrııasy komıteti onlaın kazınolardy anyqtaý jáne buǵattaý boıynsha jumys júrgizip keledi. Jyl basynan beri 3670 ınternet kazıno buǵattaldy, dep habarlaıdy QazAqparat MSM baspasóz qyzmetine silteme jasap.

Sondaı-aq sot sheshimimen 5 býkmekerlik keńse men 2 totalızatordyń lıtsenzııasy toqtatyldy.

Buǵan lıtsenzııalyq alymdy tóleý qaryzy, oıyn aımaqtarynan tys tirkeý, mindetti rezervtiń bolýy boıynsha talaptardy oryndamaý jáne basqa da kemshilikter negiz boldy.

2022 jyly komıtet 4 oıyn avtomattary zalyna jospardan tys tekserý júrgizgen bolatyn.

Tekserý nátıjesi boıynsha 1 zal jabylyp, lıtsenzııadan aıyryldy, 3 zaldyń qyzmeti toqtatyldy jáne 6 ákimshilik aıyppul salyndy.

«Jasyratyny joq, onlaın kazınolar, atap aıtqanda, olardyń jarnamasy ońaı jeńiske jetýge ýáde beredi, osylaısha qumar oıynshylardan aqsha tabýǵa tyrysady. Buǵan qarsy turý úshin ınternette monıtorıng júrgizemiz jáne qoldanystaǵy lıtsenzııalardy tekseremiz. Mysaly, 4 býkmekerlik keńseniń, 3 totalızatordyń jáne 1 oıyn avtomattary zalynyń lıtsenzııasyn alyp qoıý jumysy júrgizilip jatyr»,-dep atap ótti Mádenıet jáne sport vıtse-mınıstri Erjan Erkinbaev.

2019 jyly elde ınternet resýrstardy monıtorıngileý úshin «Kıbernadzor» aqparattyq júıesi iske qosyldy.

Bul birden birneshe memlekettik organǵa, sonyń ishinde Mádenıet jáne sport mınıstrligine ınternet kazınolardy jedel anyqtaýǵa jáne olarǵa kirýge tyıym salýǵa múmkindik beredi.

Bul rette Aqparat jáne qoǵamdyq damý mınıstrligimen birlesip anyqtalǵan ınternet-kazınolardy buǵattaý týraly aqparatty qaraý merzimin qysqartý jóninde sharalar qabyldandy.